"დიპლომატთა კლუბი" მინისტრ პაატა ზაქარეიშვილის თანამდებობიდან გათავისუფლებას ითხოვს

პოლიტიკა - 13:33, 22 Feb, 2016

1116

„დიპლომატთა კლუბი“ ე.წ. სამხრეთ ოსეთის რუსეთთან მიერთების საკითხზე პაატა ზაქარეიშვილის მიერ გაკეთებულ განცხადებას მიუღებლად და უპასუხისმგებლოდ მიიჩნევს და ხელისუფლებას მინისტრის თანამდებობიდან გათავისუფლებისკენ მოუწოდებს. „დიპლომატთა კლუბის“ განცხადებას „ნიუპოსტი“ უცვლელად გთავაზობთ:

"მიმდინარე წლის 20 თებერვალს შერიგებისა და სამოქალაქო თანასწორობის საკითხებში სახელმწიფო მინისტრმა ე.წ. ცხინვალის რეგიონში/სამხრეთ ოსეთში, რუსეთის ფედერაციასთან გაერთიანების შესახებ შესაძლო რეფერენდუმთან დაკავშირებით განაცხადა: "რეფერენდუმის მიუხედავად, ე.წ. სამხრეთ ოსეთის რუსეთთან მიერთების შემთხვევაში, სტატუს-კვო არ გაუარესდება. ასეთი ღონისძიებები არანაირ შედეგებზე არ გადის, გარდა იმისა, რომ შეიძლება, საზოგადოებაში უბრალოდ გამოიწვიოს დამატებითი კითხვები, ვნებათაღელვა, ყურადღების მიპყრობა და, ბუნებრივია, უნდა მივაქციოთ ყურადღება. უნდა დავაკვირდეთ ამ მოვლენებს, მაგრამ შედეგი არ იქნება იმაზე მეტი, რაც დღეს არის. არაფერი არ მოჰყვება ამას."

იმ დროს, როდესაც რუსეთის ფედერაციას, ქვეყნის ტერიტორიის 20% დროებით აქვს ოკუპირებული, საგარეო და შიდა გამოწვევების ურთულეს ფონზე, სახელმწიფო მინისტრი უკვე მერამდენედ საუბრობს, როგორც შორეული ქვეყნის არაკომპეტენტური დამკვირვებელი და არა როგორც დროებით ოკუპირებული მხარის წარმომადგენელი.

იმის ნაცვლად, რომ ზაქარეიშვილი და საქართველოს დღევანდელი ხელისუფლება ყველა ღონეს ხმარობდნენ ჩვენი ქვეყნის ტერიტორიული მთლიანობის აღდგენის მიზნით, რაც გულისხმობს მიზანმიმართულ, გეგმაზომიერ საგარეო აქტივობას, საქართველოს ტერიტორიული მთლიანობის აღდგენასთან დაკავშირებული პრობლემატიკა საერთოდ გამქრალია საერთაშორისო რადარებიდან. მეტიც, ზაქარეიშვილის გამოსვლები ვნებს და ზიანს აყენებს ჩვენი ქვეყნის სასიცოცხლო ინტერესებს.

ხელისუფლების ,,გადალაგებულმა" პოლიტიკამ ერთი მხრივ გაათავხედა რუსული მხარის მოქმედებები და მეორე მხრივ დაგვაშორა და არაერთი კითხვის ნიშანი გააჩინა ჩვენს დასავლელ პარტნიორებთან ურთიერთობაში.

ვთვლით , რომ სახელმწიფო მინისტრმა მორიგი, უპასუხისმგებლო განცხადება გააკეთა.

მივიჩნევთ რომ ხელისუფლებამ ამჯერად მაინც უნდა იმოქმედოს ადექვატურად და გადაუდებლად გაათავისუფლოს დაკავებული თანამდებობიდან პაატა ზაქარეიშვილი. ასევე, მთავრობამ მკვეთრად უნდა გააქტიუროს საგარეო ქმედებები ზემოაღნიშნული პრობლემის მოგვარების მიზნით. გამომდინარე პრობლემის სენსიტიურობიდან, ყველა მოქმედება და გადაწყვეტილება, რომელიც კავშირში იქნება ტერიტორიული მთლიანობის აღდგენასთან, უნდა გახდეს საზოგადოებრივი განხილვის საგანი"- აღნიშნულია განცხადებაში.