"სპეცრაზმმა უარი თქვა დარბევის ბრძანების შესრულებაზე"- სააკაშვილმა რ2-ის მოვლენებზე ისაუბრა

პოლიტიკა - 11:02, 22 Feb, 2016

5244

ოდესის გუბერნატორი მიხეილ სააკაშვილი „რუსთავი2“-ის ირგვლივ რამდენიმე თვის წინ განვითარებულ მოვლენებს ეკა კვესიტაძის გადაცემაში "განსხვავებული აქცენტები" გამოეხმაურა. სააკაშვილის თქმით ივანიშვილი რ2-ის დახურვას ყველანაირი ძალით ცდილობდა და სწორედ ამიტომ ვრცელდებოდა ფარული ჩანაწერებიც:

„ყველა ჩანაწერი მოპოვებულის ეფესბეს მიერ, ეს დამიდასტურეს უკრაინის სპეცსამსახურებმა. მე არ ვაპირებ პასუხს, რაც არ უნდა მკითხოთ ეფესბეს მოპოვებულ ჩანაწერებზე, რომელსაც მათი ფილიალი- საქართველოს მთავრობა იყენებს. მე ძალიან მეცოდება ის ხალხი ვინც ამას განიხილავს, განხილვითაც უკვე მათ დაკრულზე თამაშობ. კატეგორიულად მიუღებელია, მე სხვათა შორის პრინციპულად არ ვუსმენ ამ ჩანაწერებს.“- განაცხადა სააკაშვილმა.

სააკაშვილის თქმით გასაკვირი არ უნდა ყოფილიყო, რომ ის რუსთავი ორს თავდაცვისკენ მოუწოდებდა:

„ჯობია გავიზარდოთ, თავისუფლებას უნდა დაცვა და თავისუფლებისთვის საჭიროა ბრძოლა. თუ ყველაფრის ჩაბარება გინდათ უბრძოლველად ჩააბარეთ, მაგრამ მაშინ მომავალი არ გვაქვს. ჩემთვის სისხლისღვრა და ძალადობა მიუღებელია, ჩემი ცხოვრების ამოცანა, აზარტი და დრაივი არის მშენებლობა და განვითარება, მაგრამ ჩვენ საქმე გვაქვს ბრუტალურ ძალასთან“- აღნიშნა სააკაშვილმა.

ჟურნალისტის ნათქვამზე იმასტან დაკავშირებით , რომ რუსთავი2-მა თავის დაცვა არა ძალით, არამედ სამოქალაქო სექტორის აქტიურობით და საერთაშორისო მხარდაჭერით მაინც შეძლო, სააკაშვილმა უპასუხა, რომ რ2-ის გადარჩენის ერთ-ერთი მიზეზი ისიც იყო, რომ სპეცრაზმმა ტელეკომპანიაში შეჭრაზე უარი განაცხადა:

„სპეცრაზმმა უარი თქვა დარბევის ბრძანების შესრულებაზე, ეს ვიცი ზუსტად. აღმოჩნდა, რომ ივანიშვილს მთავარი კბილი მოუცვდა, ძალისმიერი აპარატი მას საქართველოში არ ყავს, ამიტომ შეეცადა ვიღაც ბანდიტებისგან ჯგუფების შექმნას. ეს კაცი ყველა ძალის გამოყენებით აპირებდა ერთადერთი თავისუფალი ტელევიზიის დახურვას. თავისი ფრაქციის წევრებს უთხრა, ხვალ შევდივარ და ვამთავრებ რუსთავი2-სო. ამიტომ მეშინია, რომ ძალადობისკენ არ წასულიყო დ არ წავიდეს. მაგრამ ვერ შეძლებს. თუკი ხალხი იქნება მობილიზებული, საქართველოში ძალადობრივი სცენარი ვერ შედგება". - განაცხადა სააკაშვილმა.