ორი პოლიციელის მკვლელობაში ბრალდებული ფსიქიატრიულ დაწესებულებაში გადაიყვანეს

სამართალი - 14:36, 17 Feb, 2016

5444

თელავში ორი პოლიციელის, გელა ლამაზოშვილისა და მაია ჯავახიშვილის მკვლელობაში ბრალდებული ფსიქიატრიულ დაწესებულებაში იძულებითი მკურნალობა მიესაჯა.

ბრალდებულის ადვოკატის - მურად პოპიაშვილის განცხადებით, სასამართლომ ეს გადაწყვეტილება ექსპერტიზის დასკვნის საფუძველზე მიიღო, რომლის მიხედვითაც, 19 წლის სანდრო მეტრეველი შეურაცხადია და სისხლის სამართლის პასუხისმგებლობა ვერ დაეკისრება.

ადვოკატი აცხადებს, რომ მეტრეველი ხონის სპეციალიზებულ სამკურნალო დაწესებულებაში ოთხი წელი დარჩება.

"პროკურატურა ვალდებული იყო, ექსპერტიზის დასკვნის საფუძველზე, აღნიშნული შუამდგომლობით მიემართა სასამართლოსთვის. სანდრო მეტრეველის მკურნალობა ოჯახმა ამ შემთხვევამდე, 2 წლის წინ დაიწყო, რისი დამადასტურებელი დოკუმენტებიც დევს საქმეში", - განაცხადა ადვოკატმა.

პოლიციელები - მაია ჯავახიშვილის და გელა ლამაზოშვილი თელავში 2015 წლის 30 დეკემბერს, საპატრულო პოლიციის დეპარტამენტის კახეთის მთავარი სამმართველოს ეზოში მოკლეს.

სამართალდარღვევათა აღრიცხვისა და ანალიზის განყოფილების თანამშრომელ მაია ჯავახიშვილს და პოლიციის კაპიტან გელა ლამაზოშვილს სანადირო თოფიდან ესროლეს. პოლიციელებზე თავდასხმაში ბრალდებული სამართალდამცველებმა ცხელ კვალზე დააკავეს