ტესტები წინასწარცნობილი პასუხებით- მამუკა ახვლედიანმა NGO- ებს სკანდალური დოკუმენტი გააცნო

სამართალი - 12:22, 02 Feb, 2016

2244

თბილისის საქალაქო სასამართლოს თავმჯდომარემ მამუკა ახვლედიანმა იუსტიციის უმაღლეს საბჭოში მოსამართლეთა შერჩევა-დანიშვნის პროცესის დროს არსებულ დარღვევებთან დაკავშირებით არასამთავრობო ორგანიზაციებთან შეხვედრა გამართა. ახვლედიანმა არასამთავრობო სექტორს დარღვევებთან დაკავშირებით კონკრეტული დოკუმენტაცია გააცნო, რომლითაც დგინდება, რომ მოსამართლეთა საკვალიფიკაციო გამოცდისას ერთ-ერთმა კონკურსანტმა წინასწარ იცოდა ტესტის პასუხები. ახვლედიანის თქმით ამჟამად საუბარი ერთ კონკურსანტზეა თუმცა სავარაუდოა, რომ ეს რიცხვი გაცილებით დიდია. ახვლედიანი წყაროს არ ასახელებს, თუმცა არ გამორიცხავს, რომ დაინტერესების შემთხვევაში მოხდეს მისი წყაროს დასახლება. არასამთავრობოების განცხადებით აუცილებელია რომ ეს საკითხი იუსტიციის უმაღლესმა საბჭომ განიხილოს და იმ შემთხვევაში თუ დანაშაული გამოიკვეთა, ამ საქმეზე სისხლის სამართლის გამოძიება დაიწყოს. მათი თქმით აღნიშნული ფაქტი კიდევ ერთხელ ადასტურებს , თუ რამდენად ხარვეზიანია მოსამართლეთა შერჩევა-დანიშვნის წესი.

„იუსტიციის უმაღლესი საბჭოდან გადიოდა ტესტები, თუ მართალია, ეს დარღვევაა და შესაბამისმა ორგანოებმა უნდ შეისწავლონ.“- განაცხადა „საერთაშორისო გამჭვირვალობა -საქართველოს“ ხელმძღვანელმა ეკა გიგაურმა.

ადამიანის უფლებების სწავლებისა და მონიტორინგის ცენტრის იურისტის თიკო ვერძეულის თქმით, თუკი შესაბამისი პროცედურების გზით დადასტურდება რომ კონკურსის განმავლობაში გარკვეული პირები პრივილეგირებულ მდგომარეობაში იყვნენ, ეს საფუძველს იძლევა რომ კონკურსის შედეგები შეიცვალოს.