პროკურორი ფატუ ბენსუდა აგვისტოს ომის გამოძიების დაწყებასთან დაკავშირებით ჰააგის სისხლის სამართლის საერთაშორისო სასამართლოს გადაწყვეტილებას ეხმაურება. პროკურორის თქმით, სხვადასხვა წყაროებიდან მისმა გამომძიებლებმა 2008 წლის ომთან დაკავშირებით ინფორმაციები უკვე შეაგროვეს. ბენსუდა პირობას დებს, რომ გამოძიება ობიექტური იქნება.

"სისხლის სამართლის საერთაშორისო სასამართლომ ჩემს ოფისს მისცა უფლება, რომ დაიწყოს გამოძიება საქართველოში 2008 წლის შეიარაღებული კონფლიქტის დროს ჩადენილ დანაშაულებზე. გამოძიების დაწყება გასული წლის ოქტომბერში მოვითხოვეთ, საქართველოში ჩადენილი დანაშაულებების შესახებ სანდო ინფორმაციის საფუძველზე, რომელშიც სამივე მხარე მონაწილეობდა. სასამართლოს არ შეუძლია გამოძიების დაწყება იმ შემთხვევაში თუ სახელმწიფო უკვე იძიებს იმავე საქმეებს. ბოლო დრომდე ქართული და რუსული გამოძიებები პროგრესულად მიმდინარეობდა, თუმცა საქართველოში მარტში ამ მიმართულებით მუშაობა შეწყდა. ჩვენი გამომძიებლები ინფორმაციას სხვადასხვა წყაროდან შეაგროვებენ. ის იქნება დამოუკიდებელი და მიუკერძოებელი,"- განაცხადა ფატუ ბენსუდამ.