მებაჟეებმა ბათუმის პორტში შამპუნის ბოთლში გადამალული ნარკოტიკი აღმოაჩინეს

სამართალი - 14:47, 27 Jan, 2016

2441

9,3 გრამი მარიხუანა და 1,57 გრამი მეტამფეტამინი აღმოაჩინეს შემოსავლების სამსახურის თანამშრომლებმა საბაჟო გამშვებ პუნქტზე „ბათუმის პორტი“. თბომავალ „ვილნიუს სივეისით“ საქართველოში შემოსულ სატვირთო ავტომობილში, რომელიც საბორნე გემით, მძღოლის გარეშე გადაადგილდებოდა, უფლებამოსილი პირის მიერ დათვალიერებისას აღმოჩენილ იქნა სხვადასხვა დასახელების პირადი მოხმარების საქონელი, მათ შორის, HEAD & SHOULDERS-ის ფირმის შამპუნი და NIVEA-ს ფირმის ბალზამი. ეჭვის საფუძველზე აღნიშნული ნივთების შიგთავსიც დაათვალიერეს და პოლიეთილენში შეხვეული ნარკოტიკები აღმოაჩინეს. ავტომანქანას უკრაინიდან საქართველოში შემოჰქონდა მოქალაქე რ.ა.-ის კუთვნილი საქონელი.

საქმე შემდგომი რეაგირების მიზნით გადაეცა საქართველოს შინაგან საქმეთა სამინისტროს აჭარის პოლიციის დეპარტამენტის ქ. ბათუმის საქალაქო სამმართველოს პოლიციის მე-5 განყოფილებას.

ასევე ნარკოტიკული ნივთიერების შემცველი მედიკამენტის უკანონო შემოტანის ფაქტი გამოვლინდა 24 იანვარს, საბაჟო გამშვებ პუნქტზე „თბილისის საეროპორტი“. რეისით სტამბოლი - თბილისი ჩამოფრინდა ნიგერიის მოქალაქე ს.ჯ.ო., რომლის კუთვნილი ბარგის რისკის პროფილის საფუძველზე დათვალიერების შედეგად მებაჟე ოფიცრებმა 39 აბი MEDTRAM აღმოაჩინეს.

საქმე შემდგომი რეაგირების მიზნით გადაეცა შინაგან საქმეთა სამინისტროს ისანი-სამგორის სამმართველოს მე-6 განყოფილებას.