ინციდენტების პრევენციისა და მათზე რეაგირების მექანიზმის ფარგლებში რიგით 62-ე შეხვედრა მიმდინარეობს ერგნეთში. მხარეები საქართველოს მოქალაქეების უკანონოდ დაკავებების, ე.წ. საზღვრის მიმდებარე ტერიტორიაზე მავთულხლართების მონტაჟის პროცესზე და ახალგორის მკვიდრის დავით ბაშარულის ცხედრის სასამართლო სამედიცინო დასკვნის შესახებ მსჯელებენ.

როგორც სახელმწიფო უსაფრთხოების სამსახურის საინფორმაციო ანალიტიკური დეპარტამენტის ხელმძღვანელმა, ირაკლი ბერაიამ განაცხადა, 2016 წლის იანვრის განმავლობაში ე.წ. საზღვრის უკანონოდ გადაკვეთის ბრალდებით ოკუპირებული ტერიტორიის პერიმეტრზე სამი პირის დაკავება მოხდა, თუმცა ამ დროისთვის სამივე მათგანი გათავისუფლებულია.

მისივე თქმით ამ დრომდე ცხინვალის მილიციის წინასწარი პატიმრობის იზოლატორში რჩება ორი პირი, რომლებიც ოკუპანტებმა 2015 წლის ნოემბერსა და აპრილში დააკავეს. მათ გათავისუფლების საკითხს ქართული მხარე დღევანდელ შეხვედრაზე დააყენებს. ოსური მხარის წარმომადგენლებს და ჯგუფის ხელმძღვანელს დავით სანაკოევს შეხვედრის დაწყებამდე კომენტარი არ გაუკეთებიათ.