"მე თავს ვერავისზე ვერ დავდებ" - ბიძინა კუჭავას პირველი ცოლი ქირიებს უსამძიმრებს

სამართალი - 12:52, 20 Jan, 2016

7843

პროკურორ ვახტანგ ქირიას მკვლელობაში ბრალდებული ბიძინა კუჭავას ყოფილი მეუღლე მაია კუჭავა აცხადებს, რომ ბრალდებული "ამ სცენარით ნამდვილად არ იმოქმედებდა."
მაია კუჭავა გამორიცხავს, რომ მისმა ყოფილმა ქმარმა, პროკურორი ვახტანგ ქირია მოკლა და შემდეგ სიცოცხლე თვითმკვლელობით დაასრულა.
"მინდა გითხრათ, რომ ეხლა ჩემთვის ძალიან მძიმე დღეებია. შექმნილი ვითარებიდან გამომდინარე, არანაკლები ვიდრე მქონდა 2006 წლის იანვარში. სწორედ ამიტომ მინდა მოგახსენოთ ჩემი პოზიცია და გამოვთქვა ჩემი გულისტკივილი.
ბიძინა კუჭავა ეს იყო ადამიანი, რომელთანაც მაკავშირებს მთელი ცხოვრება. რომელთანაც მაკავშირებს შვილები და საერთოდ, ყველა და ყველაფერი. ჩვენ მრავალი წელი ვცხოვრობდით ერთად და დარწმუნებული ვარ იმაში, რომ საკუთარ თავზე მეტად ვიცნობდი.
მე თავს ვერავისზე ვერ დავდებ, მაგრამ მინდა დაგარწმუნოთ, რომ ბიძინა კუჭავა იყო საკმაოდ ძლიერი და ჭკვიანი პიროვნება და ის ამ სცენარით არავითარ შემთხვევაში არ იმოქმედებდა.
ამიტომაც, ჩემთვის მიუღებელი და დაუჯერებელია ეს ყველაფერი. პირადად მე ამის არ მჯერა, დანარჩენი კი თქვენთვის მომინდვია განსასჯელად. აქვე, გულწრფელად მინდა მივუსამძიმრო ბატონ ვახტანგ ქირიას ოჯახს და ღრმა მწუხარება გამოვთქვა მომხდარის გამო"- აღნიშნავს ბრალდებულის ყოფილი მეუღლე.

შეგახსენებთ, რომ პროკურორი ვახტანგ ქირია გარდაცვლილი შაბათ საღამოს იპოვეს. შსს-ს ინფორმაციით, მკვლელობაში ბრალდებული რადიო „საქართველოს ხმის“ დირექტორი ბიძინა კუჭავაა, რომელმაც თავი მოიკლა. თუმცა განსხვავებული პოზიცია აქვთ კუჭავას ოჯახის წევრებს და ადვოკატებს. მათ გამოძიების ვერსიის არ სჯერათ.
ბიძინა კუჭავას ხვალ დაკრძალავენ.