სასამართლომ "კაბელების საქმეზე" ადვოკატების მიერ წარდგენილი სკანდალური დოკუმენტი დასაშვებად ცნო

სამართალი - 15:25, 18 Jan, 2016

2147

თბილისის საქალაქო სასამართლომ ე.წ. კაბელების საქმეზე ადვოკატების მიერ წარდგენილი სკანდალური დოკუმენტი, როგორც მტკიცებულება, დასაშვებად ცნო. დოკუმენტი, რომელიც ოფიციალური სატენდერო შეთავაზებაა თავდაცვის სამინისტროს J6-ის თანამშრომელმა, პოლკოვნიკმა თემურ მირიანაშვილმა წარმოადგინა. "კაბელების საქმის" ადვოკატების თქმით, ამ დოკუმენტით მტკიცდება, რომ "სილქნეტთან" გაფორმებული ხელშეკრულებით, თავდაცვის სამინისტროს მაღალჩინოსნებმა დიდი ოდენობით სახელმწიფო თანხები, 13 მილიონ ლარზე მეტი, დაზოგეს.

დოკუმენტის თანახმად, რომელიც სასამართლომ სამხილად მიიღო გიორგი ჯალიაშვილი, კომპანია ,,დელტა ნეტის“ სახელით, თავდაცვის სამინისტროს სთავაზობს კონტრაქტის დადებას, რომლის თანახმად 1 წყვილი ოპტიკურ-ბოჭკოვანი წვერით მომსახურების ყოველთვიურ ღირებულებად შეთავაზებული იყო 80 000 ლარი დღგ-ის ჩათვლით.
იმ შემთხვევაში, თუ გაფორმდებოდა ხელშეკრულება შპს ,,დელტა ნეტსა“ ანუ იგივე „დელტა კომმსა“ და თავდაცვის სამინისტროს შორის 21 წლის ვადით, თავდაცვის სამინისტროს შპს ,,დელტა ნეტისათვის“ მხოლოდ მომსახურებისათვის უნდა გადაეხადა 20 160 000 ლარი დღგ-ის ჩათვლით, მაშინ, როდესაც თავდაცვის სამინისტროსა და სს ,,სილქნეტს“ შორის 2013 წლის 26 დეკემბერს დადებული ხელშეკრულებით თავდაცვის სამინისტრომ სს ,,სილქნეტისაგან“ 6 720 877, 42 ლარად (დღგ-ის ჩათვლით) შეიძინა, რაც 13 439 123 ლარით უფრო ნაკლებია „დელტაკომის“ მიერ შემოთავაზებულ ფასსზე.

"კაბელების" ადვოკატების შეფასებით ეს დოკუმენტი მთლიანად ცვლის და ანგრევს ბრალდებას და პროკურატურის საყრდენს, ვინაიდან, ბრალდება მოცემულ საქმეზე მთლიანად არის აგებული იმ გარემოებაზე დაყრდნობით, რომ ბრალდების მხარის თვალსაზრისით შპს „დელტა-კომმი“ გაცილებით უფრო იაფად შეასრულებდა თავდაცვის სამინისტროს მოთხოვნებს, ვიდრე კომპანია სს „სილქნეტი“. ხოლო შპს ,,დელტა-კომმის“ წარმომადგენელი, მთელი ამ ხნის განმავლობაში აცხადებდა, რომ აღნიშნულ მომსახურებას უფასოდ გაუწევდა თავდაცვის სამინისტროს.
სხდომას ‘’თავისუფალი დემოკრატების’’ ლიდერები დაესწრნენ.