სამეგრელო-ზემო სვანეთის საოლქო პროკურატურის უფროსი პროკურორის ვახტანგ ქირიას მკვლელობის საქმეზე ბრალდებული ბიძინა კუჭავას მეუღლე მარინე ნიკოლოზაშვილი პირველ კომენტარს აკეთებს და მისი მეუღლის მიერ ქირიას მკვლელობას გამორიცხავს.

კომენტარი მან გვიან ღამით ჟურნალისტებთან გააკეთა. როგორც ნოკოლოზაშვილი ამბობს, მისი მეუღლის გარდაცვალების ამბავი პროკურატურაში გაიგო, როდესაც იგი დაკითხვაზე იმყოფებოდა.

„სანამ დასკვნა არ დაიდება, ძალიან დიდი კითხვები იბადება. კითხვები გაგვაჩნია მეც და ჩემს ოჯახსაც. გამოვრიცხავ ბიძინას თვითმკვლელობას და მის ქმედებას ქირიასთან მიმართებაში. ვერ მოკლავდა ვახტანგს ნამდვილად. ჩვენ ძალიან ახლოს ვართ ოჯახებით“, - ამბობს ნიკოლოზაშვილი.

პროკურორი ვახტანგ ქირია გარდაცვლილი შაბათს საღამოს იპოვეს. შსს-ს ინფორმაციით, მკვლელობაში ბრალდებული რადიო „საქართველოს ხმის“ დირექტორი ბიძინა კუჭავაა, რომელმაც გუშინ დილით თავი მოიკლა.