თბილისის საქალაქო სასამართლომ ჟურნალ ,,ლიბერალის“ პოლიტიკის განყოფილების რედაქტორის ირაკლი აბსანძის მიმართ გამამართლებელი განაჩენი გამოიტანა.

ინფორმაციას „ახალგაზრდა იურისტთა ასოციაცია“ ავრცელებს, რომელიც აბსანძის ინტერესებს იცავდა.

„საია იცავდა ჟურნალ ,,ლიბერალის“ პოლიტიკის განყოფილების რედაქტორ ირაკლი აბსანძეს, რომლის მიმართაც გამოძიება 2013 წელს ნარკოტიკული საშუალების უკანონო შეძენა-შენახვას ბრალდებით დაიწყო (დანაშაული, გათვალისწინებული სისხლის სამართლის კოდექსის 260-ე მუხლის პირველი ნაწილით), რაც ითვალისწინებს თავისუფლების აღკვეთას ექვს წლამდე ვადით. კერძოდ, პროკურატურის ინფორმაციით მეგობრის მიერ ირაკლისათვის გამოგზავნილ ამანათში ნარკოტიკული საშუალება აღმოჩნდა.

საქმეში არსებული მტკიცებულებებით არ დასტურდებოდა დანაშაულის ჩადენის ფაქტი, მიუხედავად ამისა, პროკურატურამ უარი არ თქვა ბრალდებაზე და მოითხოვა ბრალდებულის მიმართ გამამტყუნებელი განაჩენის გამოტანა.

დღეს თბილისის საქალაქო სასამართლომ გაიზიარა საიას ადვოკატის არგუმენტები და აღნიშნულ საქმეზე გამამართლებელი განაჩენი გამოიტანა“, - ნათქვამია საია-ს მიერ გავრცელებულ ინფორმაციაში.