ე.წ. კოკაინის საქმეზე დაკავებული ანასტასია ზაუტაშვილის საკანი გაჩხრიკეს. ინფორმაცია „ნიუპოსტს“ ბრალდებულის ადვოკატმა მირიან ნიკოლაძემ დაუდასტურა.

მისი ინფორმაციით, შემთხვევა გუშინ, ზაუტაშვილის დაბადების დღის მეორე დღეს მოხდა.

„გუშინ საღამოს დამიკავშირდა ანასტასია ზაუტაშვილი, რომელმაც მითხრა, რომ მის საკანში ჩხრეკა ჩატარდა. ჩხრეკის ჩატარების საფუძველი გახდა ელისაშვილის განცხადება, რომ ანასტასია ზაუტაშვილი პრიორიტეტული პატიმარია. ჩხრეკა ჩატარდა მოულოდნელად, ეს იყო მორიგი სისულელე. დადასტურდა, რომ ანასტასია ზაუტაშვილი არათუ პრივილეგირებული პატიმარია, არამედ გოგო, რომელიც ხატავს და ქარგავს, მისი ნამუშევრები გადის გამოფენები, ვერ სარგებლობს ელემენტარული საშუალებებითაც კი. მაგალითად, არ აქვს საღებავები. ვერ ქარგავს, რადგან არ აძლევს ადმინისტრაცია გარკვეულ აუცილებელ ატრიბუტებს ამ ქარგვისთვის. როდესაც 6 წელია ზიხარ საპატიმროში და გამომძიებლები შემოდიან საკნის გასაჩხრეკად, ეს დიდი შეურაცხყოფაა. არის მცდელობა, რომ ზაუტაშვილს ყველა ფეხის ნაბიჯზე დისკომფორტი აგრძნობინონ“, - ამბობს ადვოკატი.

შეგახსენებთ, ანასტასია ზაუტაშვილი და მასთან ერთად ბრალდებული 4 პირი სამართალდამცველებმა 2010 წლის 2 ივნისს დააკავეს. ორი თვის წინ შეწყალების კომისიის ყოფილმა თვამჯდომარემ ალეკო ელისაშვილმა განაცხადა, რომ სწორედ ე.წ. კოკაინის საქმეზე დაკავებულების შეწყალებას ითხოვდნენ მანანა კობახიძე და ეკა ბესელია. ბრალდებას უმრავლესობის დეპუტატები უარყოფენ. კობახიძესთან და ბესელიასთან კავშირი ანასტასია ზაუტაშვილმაც უარყო.