ზაჰირ ჰუსეინოვს, რომელმაც აბაშიძეების ოჯახისგან ანტონ ვან დეიკის ტილო შეიძინა, დღეს ფინანსთა სამინისტროს საგამოძიებო სამსახურში 11:00 საათზე ელოდებიან. ჰუსეინოვი ფინანსურ პოლიციას იმ დოკუმენტაციას წარუდგენს, რომლითაც მისი ინფორმაციით, დასტურდება, რომ აბაშიძეებსგან ტილო მან შეიძინა და საქართველოდან ლეგალურად გაიტანა.

საგამოძიებო უწყებაში ელოდებიან ასევე მალხაზ მახარაძესაც. იგი ფინანსურ პოლიციაში 14:00 საათზეა დაბარებული.

მას შემდეგ რაც თურქული მედიით გავრცელდა ინფორმაცია, რომ ნახატის არალეგალურად გაყიდვის ბრალდებით ორი ბიზნესმენი დააკავეს, თბილისში აბაშიძეების ოჯახმა განაცხადა, რომ ტილო მათ ეკუთვნოდათ.

ოჯახის ინფორმაციით, ეს ნახატი მათ ოჯახში 15 წლის განმავლობაში ინახებოდა და გადაწყვეტილება ნახატის გაყიდვის შესახებ 2010 წელს მიიღეს. აბაშიძის თქმით, ნახატის იმ დროს 80-100 ათას დოლარად იყო შეფასებული. თუმცა როგორც აბაშიძე ამბობს, ნახატი 37 ათას დოლარად გაყიდეს. ოჯახის ინფორმაციით, მყიდველმა მათ მხოლოდ 7 ათასი დოლარი გადაუხადა.