ქვემო ქართლის ყოფილი გუბერნატორის დავით კირკიტაძის ძმა ირაკლი კირკიტაძე პატიმრობაში რჩება. გადაწყვეტილება საქალაქო სასამართლომ ცოტა ხნის წინ გამოაცხადა.

პროცესზე კირკიტაძემ მის დაკავებას დადგმული პროვოკაცია უწოდა. როგორც მან განაცხადა, პროკურატურას მის დაკავებას პოლიტიკური მიზნებისთვის იყენებს.

დაკით კირკიტაძის ძმა სამართალდამცველებმა ხულიგნობის ფაქტზე დააკავეს. აღნიშნულთან დაკავშირებით დღეს განცხადება შინაგან საქმეთა სამინისტრომაც გაავრცელა.

"თბილისის პოლიციის დეპარტამენტის დიდუბე-ჩუღურეთის სამმართველოს 1-ლი განყოფილების თანამშრომლებმა, ოპერატიულ-საგამოძიებო ღონისძიებების შედეგად, 1979 წელს დაბადებული ირაკლი კ. ხულიგნობის ბრალდებით დააკავეს.

გამოძიებამ დაადგინა, რომ დაკავებულმა თბილისში, დიღმის მასივის მე-5 კვარტალში, უხეშად დაარღვია საზოგადოებრივი წესრიგი, სიტყვიერი და ფიზიკური შეურაცხყოფა მიაყენა მოქალაქეს და თავის არეში ცეცხლსასროლი იარაღი ჩაარტყა, რითაც მიაყენა ჯანმრთელობის დაზიანება.

გამოძიება ცეცხლსასროლი იარაღის გამოყენებით ჩადენილი ხულიგნობის (საქართველოს სსკ-ის 239-ე მუხლის მე-3 ნაწილი) ფაქტზე მიმდინარეობს", - ნათქვამია შსს-ს მიერ გავრცელებულ განცხადებაში.