დავით კირკიტაძის ძმის, ირაკლი კირკიტაძის აღკვეთის ღონისძიების საკითხზე საქალაქო სასამართლო დღეს იმსჯელებს. სხდომა 18:30 წუთზეა ჩანიშნული. როგორც ცნობილია, პროკურატურა კირკიტაძის მიმართ აღკვეთის ღონისძიებად პატიმრობის გამოყენებას მოითხოვს.

ცოტა ხნის წინ დავით კირკიტაძის ძმის დაკავებასთან დაკავშირებით განცხადება გაავრცელა შსს-მ, სადაც ნათქვამია, რომ ყოფილი გუბერნატორის ძმა ხულიგნობის მუხლით არის დაკავებული.

"თბილისის პოლიციის დეპარტამენტის დიდუბე-ჩუღურეთის სამმართველოს 1-ლი განყოფილების თანამშრომლებმა, ოპერატიულ-საგამოძიებო ღონისძიებების შედეგად, 1979 წელს დაბადებული ირაკლი კ. ხულიგნობის ბრალდებით დააკავეს.

გამოძიებამ დაადგინა, რომ დაკავებულმა თბილისში, დიღმის მასივის მე-5 კვარტალში, უხეშად დაარღვია საზოგადოებრივი წესრიგი, სიტყვიერი და ფიზიკური შეურაცხყოფა მიაყენა მოქალაქეს და თავის არეში ცეცხლსასროლი იარაღი ჩაარტყა, რითაც მიაყენა ჯანმრთელობის დაზიანება.

გამოძიება ცეცხლსასროლი იარაღის გამოყენებით ჩადენილი ხულიგნობის (საქართველოს სსკ-ის 239-ე მუხლის მე-3 ნაწილი) ფაქტზე მიმდინარეობს", - ნათქვამია შსს-ს მიერ გავრცელებულ განცხადებაში.