არასამთავრობო ორგანიზაცია „სამართალდამცველთა რეფორმირების ცენტრის“ ხელმძღვანელი ზვიად კუპრავა პროკურატურაში იმყოფება. მან საგამოძიებო უწყებას ე.წ. პოლიტპატიმართა სიაში კრიმინალების მოხვედრის შესახებ ინფორმაცია უნდა მიაწოდოს.

როგორც პროკურატურაში შესვლამდე კუპრავამ განაცხადა, სიაში შეყვანილია ბევრი ისეთი ადამიანი, ვისაც მძიმე დანაშაული აქვს ჩადენილი და მათ პოლიტიკასთან შეხება არ აქვთ.

„ხუთმა არასამთავრობო ორგანიზაციამ მთავარ პროკურატურაში შევიტანეთ საჩივარი ეკა ბესელიას, მანანა კობახიძის, მერაბ ტურავას, ნინო გვენეტაძის და პოლიტპატიმართა სიის შემდგენი კომისიის სხვა წევრების მიმართ იმასთან დაკავშირბეით, რომ აღნიშნულ სიაში მოხვდნენ ადამიანები, რომლებიც მსჯავრდებულები და ბრალდებულები იყვნენ სხვადასხვა მძიმე და განსაკუთრებით მძიმე დანაშაულში. მიუხედავად იმისა, რომ ადამიანები, რომლებსაც არცერთ პოლიტიკურ პროცესში არ მიუღიათ მონაწილეობა, მაინც მოხვდნენ პოლიტპატიმართა სიაში. ამ სიაში არის ზურაბ შალიკიანი, რომელსაც პოლიტიკური კარიერა არ ჰქონია, არის კრიმინალური ავტორიტეტი. პარლამენტის ამ დადგენილებაში 60-მდე პირია, რომელიც 260-ე მუხლით არიან დაკავებული. ეს მუხლი ნარკოდანაშაულს ითვალისწინებს " - განმარტავს ზვიად კუპრავა.