თელავში დაჭრილი პოლიციელის მაია ჯავახიშვილის დასახმარებლად თბილისიდან ვერტმფრენით ექიმთა ჯგუფი გაიგზავნა.

ამის შესახებ შინაგან საქმეთა მინისტრმა გიორგი მღებრიშვილმა განაცხადა, რომელიც ამ დრომდე რჩება თელავის საავადმყოფოში, სადაც მაია ჯავახიშვილს ოპერაცია უტარდება.

მისი თქმით, არსებული ინფორმაციით, დანაშაულში ბრალდებულს ფსიქიკური პრობლემები აღენიშნება.

„გავრცელდა ინფორმაცია, თითქოს ავტომატური ცეცხლსასროლი იარაღით შეიჭრა დამნაშავე საპატრულოს ეზოში, ეს არასწორია. გასროლა განხორციელდა სანადირო თოფით. ვიცი, რომ პირი, რომელიც დაკავებულია, მის საცხოვრებელს სახლს და საპატრულოს შენობას ერთი ღობე ჰყოფს. გასროლა მისი ეზოდან განხორციელდა. წინასწარი ინფორმაციით, დაკავებულს ფსიქიკური პრობლემები აქვს. ყველაფერს გავაკეთებთ, რომ მეორე ჩვენი თანამშრომელი გადარჩეს. დადასტურებით ვამბობ, რომ შურისძიებას ან მსგავს ფაქტს ადგილი არ აქვს“, - განაცხადა შს მინისტრმა.

შეგახსენებთ, თელავის საპატრულო პოლიციის ეზოში სამართალდამცველი მოკლეს.