გიორგი ოქროპირიძეს ლაშა მახარაძის მკვლელობისთვის 20 წელი მიესაჯა

სამართალი - 16:34, 26 Dec, 2015

2372

ლაშა მახარაძის მკვლელობის საქმეში ბრალდებულ გიორგი ოქროპირიძეს სასამართლომ 20 წლით თავისუფლების აღკვეთა მიუსაჯა. ოქროპირიძე ნაფიცმა მსაჯულებმა გუში დამნაშავედ სცნეს, ხოლო დღეს საბოლოო ვერდიქტი მოსამართლე ეკა არეშიძემ გამოაცხადა. გიორგი ოქროპირიძე უდანაშაულოდ სცნეს იარაღის უკანონოდ შენახვა-ტარებაში, ხოლო განზრახ მკვლელობაში დამნაშავედ გამოაცხადეს.

ლაშა მახარაძე 2014 წლის 2 სექტემბერს, თბილისში აბაშიძის ქუჩაზე მოკლეს.

აღნიშნულ განაჩენთან დაკავშირებით სასამართლომ სპეციალური განცხადება გაავრცელა:

"2015 წლის 26 დეკემბერს, თბილისის საქალაქო სასამართლოში, სასჯელის დანიშვნის სხდომა გაიმართა ბრალდებულ გიორგი ოქროპირიძის მიმართ, დამამძიმებელ გარემოებებში ჩადენილი განზრახი მკვლელობის დანაშაულის ფაქტზე, ნაფიც მსაჯულთა განსჯად სისხლის სამართლის საქმეზე.

ბრალდების მხარის პოზიციის გათვალისწინებით, ნაფიცი მსაჯულები სასჯელის დანიშვნის სხდომაში არ მონაწილეობდნენ.

ნაფიც მსაჯულთა სასამართლოს მიერ მიღებული ვერდიქტის საფუძველზე, სხდომის თავმჯდომარემ დაადგინა განაჩენი, რომლის თანახმად, გ. ოქროპირიძეს, ლაშა მახარაძის მიმართ დამამძიმებელ გარემოებებში ჩადენილი განზრახი მკვლელობისთვის, საბოლოოდ სასჯელის სახედ და ზომად 20 (ოცი) წლის ვადით თავისუფლების აღკვეთა განესაზღვრა.

შეგახსენებთ, რომ გიორგი ოქროპირიძეს ბრალად ედებოდა: განზრახ მკვლელობა დამამძიმებელ გარემოებაში, კერძოდ - არაერთგზის; ასევე, ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა, ტარება.

2015 წლის 25 დეკემბერს, ნაფიცმა მსაჯულებმა დამამძიმებელ გარემოებებში ჩადენილი გაზრახი მკვლელობისთვის გ. ოქროპირიძე დამნაშავედ სცნეს, მათ გამამტყუნებელი ვერდიქტი 10 ხმით 2-ის წინააღმდეგ მიიღეს. ნაფიცმა მსაჯულებმა გამამართლებელი ვერდიქტი მიიღეს ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა, ტარებისათვის და ბრალდების ამ ნაწილში გ. ოქროპირიძე უდანაშაულოდ სცნეს.

განაჩენი გამამტყუნებელ ნაწილში შეიძლება გასაჩივრდეს ერთჯერადად, საკასაციო წესით, თბილისის სააპელაციო სასამართლოში, მხოლოდ სისხლის სამართლის საპროცესო კოდექსით დადგენილი საფუძვლების არსებობისას."- აღნშნულია სასამართლოს განცხადებაში.