კობახიძე იატაკქვეშეთში გადავიდა

კობახიძე იატაკქვეშეთში გადავიდა - ელისო კილაძე

სამართალი - 23:03, 22 Dec, 2015

2705

ჟურნალისტ ელისო კილაძის განცხადებით, პარლამენტის ვიცე-სპიკერმა მანანა კობახიძემ სააღდგომო შეწყალების დღეებში ერთ დღეს ალეკო ელისაშვილს 6 მესიჯი გაუგზავნა. ამის შესახებ ჟურნალისტმა განცხადება გადაცემა არჩევანში გააკეთა.

ამასთან ქრონიკა პლიუსის რედაქტორი, ამბობს, რომ სისხლის სამართლის პასუხისმგებლობისთვის მზად არის, მაგრამ მანანა კობახიძეზე გავრცელებული ინფორმაციების უარყოფას არ აპირებს.

„ქალბატონი კობახიძე იატაკქვეშეთში გადავიდა, რადგან ის თუნდაც ამ ეთერში საინტერესო საცირკო წარმოდგენებს აწყობდა მე მაქვს ამონაწერი, სადაც ჩანს, რომ სწორედ სააღდგომო შეწყალების დღეებში მანანა კობახიძემ ერთ დღეს ალეკო ელისაშვილს 6 მესიჯი გაუგზავნა. თუ ქალბატონ კობახიძეს მეხსიერება არ დაუბრუნდება და შინაარსსაც ვერ გაიხსენებს, ჩვენ მათ დავეხმარებით შინაარსის გახსენებაშიც. სრული პასუხისმგებლობით ვაცხადებ, ყველა ინფორმაცია, რომელიც გავასაჯაროვე, იყო სრული სიმართლე და, თუკი სასამართლო იქნება მიკერძოებული და ჩემგან მოითხოვს ამ ფაქტების უარყოფას, მე ამ გადაწყვეტილებას არ შევასრულებ და მზად ვარ სისხლის სამართლის პასუხისმგებლობაზეც,“ - აცხადებს ელისო კილაძე.

ჟურნალისტი ელისო კილაძე აცხადებს, რომ მანანა კობახიძემ და ეკა ბესელიამ ბიძინა ივანიშვილისგან მიიღეს მითითება, რომ თავი იმართლონ და ამის შედეგია მის წინააღმდეგ შეტანილი სარჩელი.

„მათ უნდა იფიქრონ საკუთარ პოლიტიკურ პასუხისმგებლობაზე, როდესაც ინტერესდებიან მხოლოდ კოკაინის საქმეზე მსჯავრდებულებით. ამ დეპუტატების გარდა, იმედია, საზოგადოებას პასუხს მინისტრიც გასცემს, რატომ არის ციხეში პრივილეგირებულ მდგომარეობაში ანასტასია ზაუტაშვილი,“ - აცხადებს ელისო კილაძე.