მაგდა პაპიძემ მკვლელობის ღამის შესახებ სასამართლოზე ისაუბრა

სამართალი - 20:10, 22 Dec, 2015

46342

თბილისის საქალაქო სასამართლოსთვის მიცემულ ჩვენებაში შვილისა და მეუღლის მკვლელობაში ბრალდებული მაგდა პაპიძე აცხადებს, რომ მას მეუღლესთან დაძაბული ურთიერთობა ჰქონდა.
რაც ცშეეხება სისხლიან ღამეს, ბრალდებული ამტკიცებს, რომ 19 დეკემბერს, ომარ ქაფიაშვილმა 5 წლის თორნიკე ხაჩაპურის საყიდლად გაიყვანა.
"დაღლილი ვიყავი და იმ ღამით ჩამეძინა ლოდინში. 3საათი იყო დაწყებული, როდესაც გავიღვიძე და გადავწყვიტე საძებნელად წავსულიყავი.სადარბაზოდან გასასვლელში ვიწრო ადგილია, სადაც ფეხი წამოვკარი რაღაცას და დავეცი. შემდეგ აღმოვაჩინე, რომ მე ომარზე დავეცი. ამის შემდეგ, მეგონა, რომ ის მთვრალი იყო და წაიქცა. არ მიფიქრია, რომ მეუღლე და ჩემი შვილი ცოცხლები არ იყვნენ. ამის შემდეგ წავედი მანქანის გადასაყენებლად, რადგან მინდოდა ჩემი შვილი და მეუღლე მანქანაში ჩამესვა. მანქანაში ვერ ჩავსვი და ამის შემდეგ დავიწყე ყვირილი. რის შემდეგაც ჩემი დედამთილი და მეზობლები გამოვიდნენ. ამის შემდეგ მე ჩემი შვილი და მეუღლე არ მინახავს და პოლიციაში მითხრეს, რომ ორივე მე მოვკალი და ბრალი მქონდა წარდგენილი", - განაცხადა პროცესზე მაგდა პაპიძემ.
რაც შეეხება ნივთმტკიცებად ამოღებულ უროს, მის ნაგვის ურნაში გადადგებას განსასჯელი შიშით ხსნის.
პაპიძემ განაცხადა, რომ მისი მეუღლე მის მიმართ ცინიკური დამოკიდებულებით გამოირჩეოდა.
"ერთ დღეს, ომარმა ტაქსით ამიყვანა ჯვარზე. შემდეგ იქ ფეხის წვერებზე დამაყენა და ცინიკურად რაღაც კითხვებს მისვამდა. ამის შესახებ მე ჩემს მეგობარს, ოთარ ბერძენიშვილს მოვუყევი. როდესაც ომარი სვამდა, აგრესიული იყო და სწორედ ამიტომ შემეშინდა, როდესაც წაქცეული დავინახე, ვიფიქრე, ნასვამი იყო და გადავწყვიტე ურო გადამეგდო" - განაცხადა მაგდა პაპიძემ.
აღნიშნულ გარემოებებზე საუბარი განსასჯელს მას შემდეგ მოუწია, როდესაც საქმის პრპოკურორმა მოსამართლეს განუცხადა, რომ გარდაცვლილ ომარ ქაფიაშვილს თავის არეში აღენიშნება ბლაგვი საგნით მიყენებული ჭრილობა, რაც შესაძლოა სწორედ უროთი იყოს მიყენებული.
პროკურორმა პაპიძეს კითხვით მიმართა და დაინტერესდა, თუ რატომ იყო ოთახი სისხლიანი. ამის საპასუხოდ ბრალდებულმა განაცხადა, რომ ოთახი იმ დროს დასისხლიანდა როცა ეს უკანასკნელი გასაღების ასაღებად შინ შებრუნდა, რათა უგონოდ მყოფი მეუღლე და შვილი საავადმყოფოში გადაეყვანა.