პარლამენტის ვიცე-სპიკერმა მანანა კობახიძემ გაზეთ „ქრონიკა +“-ის მთავარი რედაქტორის ელისო კილაძის წინააღმდეგ სარჩელი შეიტანა.

სარჩელი კობახიძის ადვოკატმა შეიტანა. კობახიძე კილაძეს პატივისა და ღირსების შელახვასა და შეგნებულ ცილისწამებაში ადანაშაულებს.

„სასამართლოში უნდა დამტკიცდეს ცილისწამების ფაქტი ქალბატონი ელისო კილაძის მიერ. ჩვენ სასამართლოს ვთხოვთ დაავალოს მხარეს გამოაქვეყნოს სასამართლოს გადაწყვეტილება სასამართლოს მიერ დადგენილი ფორმით, პირველ რიგში იმ გაზეთში, რომელშიც აღნიშნული ინფორმაცია გამოქვეყნდა“, - აღნიშნა კობახიძისი ადვოკატმა დავით ლანჩავამ.

გაზეთ ქრონიკა პლიუსის რედაქტორი ელისო კილაძე აცხადებს, რომ საპარლამენტო უმრავლესობის წევრები ეკა ბესელია და მანანა კობახიძე კორუფციულ გარიგებაში იყვნენ ჩართულნი.

ჟურნალისტის ინფორმაციით, კობახიძე-ბესელიას დუეტმა თავის დროზე კოკაინის საქმეზე მსჯავრდებულები პოლიტპატიმართა სიაში ჩასვეს, თუმცა მაშინდელი მინისტრის მოადგილის გელა ხვედელიძის და მინისტრის ირაკლი ღარიბაშვილის უშუალო ჩარევით ყველა მათგანი ამოღებულ იქნა ამ სიიდან.