გავრცელებული ინფორმაციით, 25 წლის მაგდა პაპიძე ქმარ-შვილის მკვლელობას არ აღიარებს

სამართალი - 21:17, 20 Dec, 2015

31999

ქმარ-შვილის მკვლელობაში ჭვმიტანილი 25 წლის მაგდა პაპიძის დაკითხვა ამ დრომდე გრძელდება. შს სამინისტროს მიერ დღეს გავრცელებული ინფორმაციის თანახმად, ქალბატონი განზრახ მკვლელობის ბრალდებით დაკითხვის შემდეგ დააკავეს. მოგვიანებით გავრცელდა ინფორმაცია, რომ ქალბატონმა რამდენჯერმე შეცვალა ჩვენება. პოსტსკრიპტუმის ინფორმაციით, ის მკვლელობას არ აღიარებს. მაგდა პაპიძე დიაბეტით არის დაავადებული და ქალბატონი დაკითხვის პროცესში რამდენჯერმე შეუძლოდ გახდა.

შეგახსენებთ, რომ დიღმის მასივის მიმდებარე ტერიტორიაზე 27 წლის მამაკაცი და მისი 5 წლის შვილი მოკლული იპოვეს. ცხედრები სადარბაზოს შესასვლელთან იპოვეს. მამაკაცის დაღუპვის მიზეზი თავში მძიმე საგნის ჩარტყმა გახდა, ხოლო ბავშვი - გაგუდულია.

შემთხვევიდან რამდენიმე საათში, შს სამინისტრომ გაავრცელა ინფორმაცია, რომლის თანახმადაც სამართალდამცველებმა გამთენიისას ფერაძის ქუჩაზე მომხდარი მკვლელობა გახსნეს. უწყების ცნობით, შსს–ს თბილისის პოლიციის დეპარტამენტის დეტექტივების სამმართველოს და ვაკე–საბურთალოს სამმართველოს თანამშრომლებმა, ცხელ კვალზე ერთობლივად ჩატარებული ოპერატიულ–სამძებრო და საგამოძიებო ღონისძიების შედეგად, 1990 წელს დაბადებული მაგდა პ. განზრახ მკვლელობის ბრალდებით თბილისში დააკავეს.

,,გამოძიებით დადგინდა, რომ ბრალდებულმა მიმდინარე წლის 20 დეკემბერს, გამთენიისას, თბილისში, დიღომში, ფერაძის ქუჩაზე, ურთიერთშელაპარაკების ნიადაგზე, მეუღლეს, 1988 წელს დაბადებულ ომარ ქ–ს. ბლაგვი საგნით თავის არეში მრავლობითი დაზიანება მიაყენა, რის შედეგადაც იგი ადგილზე გარდაიცვალა. შემდეგ მაგდა პ–მ. გაგუდა მცირეწლოვანი შვილი. მან კვალის დაფარვის მიზნით, ცხედრები თავისი საცხოვრებელი ბინიდან კორპუსის წინ ეზოში გაიტანა და შემთხვევის ადგილიდან მიიმალა.

სამართალდამცველებმა, ჩატარებული ოპერატიულ–სამძებრო და საგამოძიებო ღონისძიებების შედეგად, ბრალდებული მომხდარიდან რამდენიმე საათში დააკავეს.

გამოძიება დამამძიმებელ გარემოებაში განზრახ მკვლელობის ფაქტზე მიმდინარეობს (საქართველოს სსკ–ის 109–ე მუხლით)“ - ნათქვამია უწყების განცხადებაში.