რაფალიანცის საქმის გამოძიება 60-70 დღეში - რა პირობას დებს კრიმ. პოლ-ის ყოფილი უფროსი

სამართალი - 16:40, 19 Dec, 2015

3153

ჯერ კიდევ შს მინისტრობის დროს, 2012 წელს ირაკლი ღარიბაშვილმა განაცხადა, რომ ბარბარე რაფალიანცის გარდაცვალების საქმე პირად კონტროლზე აყავს და უმოკლეს დროში გაიხსნებოდა. თუმცა 2015 წელი მთავრდება და საქმე არაა გახსნილი. ახლა უკვე პრემიერ მინისტრ ირაკლი ღარიბაშვილს საქმის გამოძიებაში დახმარებას კრიმინალური პოლიციის ყოფილი უფროსი სთავაზობს. ზაზა ჭაია „ქართულ გაზეთთან საუბარში“ აცხადებს, რომ მისცენ სპეციალური ერთჯერადი საქმის გამოძიების უფლება და ის 60-70 დღეში პროკურატურას წარუდგენს რეალურ საგამოძიებო სურათს

„გიმეორებთ, პოლიცია 6-7 წუთში მივიდა დანაშაულის ადგიზე. უამრავი ხალხი იყო, კვალი არეული, წაშლილი, განზრახ არაფერი განადგურებულა. უკვე გვქონდა საკმაოდ დამაჯერებელი წინსვლა საქმის გასახსნელად, მაგრამ სადღაც 2012 წლის 20 ოქტომბერს ჩვენ ჩამოგვაშორეს საქმეს, ახალი ხელმძღვანელობა მოვიდა. გამოძიება, გიმეორებთ, შემდეგ სხავადასხვა ვერსიებით წავიდა და დაიფანტა. სამწუხაროდ, გამომძიების არაკომპეტენტურობის ბრალი იყო. მინისტრ ღარიბაშვილის არასწორი ორიენტირება, მაშინ გამოძიების წამყვანების ბრალი იყო. მინისტრი პოლიტიკური პირია და არა გამომძიებელი. თვითონაც მოგვიანებით ეს თქვა და ბოდიში მოიხადა. არადა, ეს არ არის ძნელი საქმე. მიუხედავად დიდი დროის გასვლისა, სრულიად დარწმუნებული ვარ, რომ საქმე გახსნადია, თუ იქნება პოლიტიკური ნება. მაქვს ასეთი შეთავაზება, თუ აინტერესებს ვინმეს, რომ ბავშვის ტრაგიკული დაღუპვის ამბავს ფარდა აეხადოს. მე ახლა პენსიაზე ვარ. ვაცხადებ სრულიად კატეგორიულად, რომ არ მაინტერესებს არავითარი თანამდებობა. ახლა კმაყოფილი ვარ ჩემი სტატუსით. ვთავაზობ ხელისუფლებას, ვისაც ამის გაკეთება ძალუძს, მომცენ სპეციალური ერთჯერადი საქმის გამოძიების უფლება. ასეთი პრაქტიკა არსებობს და შესაბამისი ფორმალობა შეიძლება დაცული იყოს. მომცენ საშუალება, რომ დავაკომპლექტო ოპერატიულ- საგამოძიებო ჯგუფი, დამინიშნონ ზედამხედველი პროკურორი ან პროკურორების ჯგუფი. ოღონდ ერთი პირობით - გამომძიებლებიც და პროკურორებიც უნდა იყვნენ სპეციალიზირებული მკვლელობების საქმეების გახსნაზე. ეს ძალიან მნიშვნელოვანია, ეს ცალკე მიმართულებაა. მოგვცენ მუშაობის თავისუფლება. მე გარანტიას ვიძლევი, რომ 60-70 დღეში ჩვენ ერთობლივად პროკურატურას წარვუდგენთ რეალურ საგამოძიებო სურათს, მყარ ვერსიას, რაც პროკურატურას საშუალებას მისცემს დაადგინოს ბრალეულობა. კიდევ ვიმეორებ, მე არ მაინტერესებს შემდეგ შინაგან საქმეთა სისტემაში მუშაობა, როგორც პრიზი გაკეთებული საქმისთვის. ესაა მხოლოდ შეთავაზება, ყოველგვარი პოლიტიკის გარეშე დავადგინოთ ამ საზარელი საქმის ჩამდენი“.