ბაჩო ახალაია ითხოვს ევროსაბჭოს კომიტეტის დასკვნა საქმეს მტკიცებულებად დაერთოს

სამართალი - 14:58, 16 Dec, 2015

2609

ე. წ. ნავთლუღის სპეცოპერაციის საქმეზე ბრალდებულმა თავდაცვის ყოფილმა მინისტრმა ბაჩო ახალაიამ დღეს სასამართლო პროცესზე შუამდგომლობა დააყენა.

ახალაია ითხოვს ევროპის წამების პრევენციის კომიტეტის (CPT) დასკვნა საქმეს მტკიცებულებად დაერთოს.

გარდა ამისა ექს მინისტრმა პოლიტიკური განცხადებები გააკეთა და აღნიშნა, რომ "ღარიბაშვილი, სუბარი და კახიშვილი სულმდაბალი ადამიანები არიან, რომლებიც ფიქრობენ, რომ კრიმინალური სამყაროს გამოყენებით შეძლებენ ძალაუფლების შენარჩუნებას".

"მაქვს სურვილი, CPT-ს დასკვნა დაერთოს მტკიცებულებად აღნიშნულ საქმეს, რადგან ამ დასკვნაში საუბარია იმაზე, რაზეც მე ვსაუბრობ, რომ ჩვენ გვექცევიან სრულიად არაადამიანურად. თუმცა ვართ ჩუმად და ასე ყველაფერს ვიტანთ და ავიტანთ კიდეც, მაგრამ ეს არ არის მთავარი პრობლემა. დასკვნაში ასევე საუბარია, რომ სასჯელაღსრულების სამივე მინისტრი, ყოფილები და ამჟამინდელი "კანონიერ ქურდებთან" ერთად მუშაობენ. ჩვენ ყველაფერს ვუძლებთ და ვინც ვერ გაუძლო, გარეთ არის. ზოგი საშვილიშვილო შეცდომებსაც კი უშვებს, მაგრამ ეს ჩვენ არ გვეხება. მთავარია, რომ აღდგა სისტემა ე. წ. კანონიერი ქურდების მიერ მმართველობის. ჩვენ გვეგონა, რომ თურმე ეს ყველაფერი დავამარცხეთ, მაგრამ როგორც აღმოჩნდა, უბრალოდ შეგვიჩერებია. საბოლოოდ ძალიან მწარე ვითარებაა, მე სიმართლის დამტკიცების არ მეშინია და გთხოვთ ეს დოკუმენტი დავურთოთ საქმეს", - განაცხადა ბაჩო ახალაიამ და პროცესის გადადება მოითხოვა.

თბილისის საქალაქო სასამართლოში მოსამართლემ ბაჩანა ახალაიას მოთხოვნა პროცესის გადადების შესახებ დააკმაყოფილა.

ახალაიას მოთხოვნას არ დაეთანხმა პროკურატურის წარმომადგენელი. მისი განცხადებით, ამის საჭიროება არ იყო. თუმცა სასამართლომ შუამდგომლობა დააკმაყოფილა და პროცესი 27 იანვარს 12 საათსა და 30 წუთზე დანიშნა.

ბაჩანა ახალაიამ ასევე თქვა, რომ სასამრთლომ დაცვის მხარეს არ მისცა მოწმეთა დაკითხვის საშუალება და ის მოწმეები, რომელზე დაყრდნობითაც იქნა გადაწყვეტილება მიღებული, არიან კრიმინალური სამყაროს წარმომადგენლები, სასამრთლო სისტემა კი "შევარდნაძის დროინდელ მდგომარეობაში და კორუფციაში დაბრუნდა“. ახალაიას თქმით, მას მოსამართლეების აცილება სურდა, თუმცა აზრი არ აქვს, რადგან, მისი თქმით, სხვა მოსამართლეც იგივე სისტემის ნაწილი იქნება.

„თქვენ მხარე ხართ ამ პროცესში“ - განაცხადა ახალაიამ.