მთავარი პროკურატურის პრესსამსახურის უფროსი ნათია სუხიაშვილი ადასტურებს, რომ ალეკო ელისაშვილისა და გიორგი გოგაძის შეხვედრას ორგანიზება თავად გაუკეთა.

მისი თქმით, ელისაშვილს მთავარი პროკურორის პირველ მოადგილესთან თხოვნა პირად საკითხზე ჰქონდა.

„ელისაშვილი აპირებდა გოგაძისთვის ეთხოვა, რომ პროკურატურა მის ერთ-ერთ ახლობელს, რომელიც იყო დაზარალებული, თანხის დაბრუნებაში დახმარებოდა. ბატონი გიორგი ჩავაყენე საქმის კურსში და ამის შემდეგ შეხვედრას ორგანიზება გავუკეთე. პირადად მე დავუშვი ალეკო ელისაშვილზე ელექტრონული საშვი და დავხვდი პირველ სართულზე. ავიყვანე გიორგი გოგაძეს კაბინეტში, სადაც დაგვხვდნენ ბატონი გიორგი, ვაკე საბურთალოს რაიონული პროურორი ნიკოლოზ სანიკიძე და სამართლებრივი უზრუნველყოფის დეპარტამენტის უფროსის მოადგილე ირაკლი დონდოლაძე", - განაცხადა ნათია სუხიაშვილმა.

შეგახსენებთ, ე.წ. შეწყალების კომისიის საქმეზე მთავარი პროკურორის მოადგილე გიორგი გოგაძე, ვაკე-საბურთალოს პროკურორი ნიკა სანიკიძე და პროკურატურის საზოგადოებასთან ურთიერთობის დეპარტამენტის ხელმძღვანელი ნათია სუხიაშვილი დაიკითხნენ.