ე.წ. კოკაინის საქმეზე დაკავებულების ადვოკატი მირიან ნიკოლაძე ალეკო ელისაშვილის განცხადებებს აბსურდულს და საფუძველს მოკლებულს უწოდებს. ადვოკატის ინფორმაციით, დაკავებულების ოჯახის წევრებს ფული არავისთვის არ გადაუხდიათ.

ნიკოლაძე იხსენებს, რომ ერთადერთი ვინც ძებნაში მყოფ ნუგზარ ბოჭორიშვილს ფულის სანაცვლოდ საქმის მოგვარებას დაჰპირდა, კუდ-ის თანამშრომელი იყო.

ადვოკატის ინფორმაციით, ძებნაში მყოფ ბოჭორიშვილს კუდის თანამშრომელმა დაურეკა და უთხრა, რომ თუ 2 მილიონს გადაიხდიდა ძებნილთა სიიდან ამოიღებდნენ, რაზეც ბოჭორიშვილმა უარი განაცხადა.

„ამ ბრალდებლების დაკავებიდან ერთი წლის შემდეგ კუდ-ის თანამშრომლები დაუკავშირდნენ ნუგზარ ბოჭორიშვილს და სთხოვეს 3 მილიონი დოლარი სოსო თოფურიძის სახელით. შემდეგ ჩამოვიდნენ 2 მილიონი დოლარზე. ეს ხდება 2011 წელს. ამ დროიდან ეს 2 მილიონი სულ ფიგურირებს საქმეში. გამოვრიცხავ ამ საქმეზე პატიმრების ოჯახის წევრების კავშირს. მათ ნაცვლად თუ ვიღაც უცხოპლანეტელი იხდიდა ფულს, ეს გამოძიებამ უნდა დაადგინოს. ვიაც თანხა უნდა გადაეხადა, ამტკიცებენ რომ ეს შეთხზულია ელისაშვილის და ქორიძის მიერ. ჩვენ არაერთხელ მივმართეთ მანანა კობახიძეს რომ რეკომენდაცია გაეწია შეწყალების კომისიასთან და ეს რეკომენდაციები გამოიყენეს“, - განაცხადა მირიან ნიკოლაძემ.

მისივე ინფორმაციით, ანასტასია ზაუტაშვილი და ე.წ. კოკაინის საქმეზე მსჯავრდებულები ალეკო ელისაშვილის ინფორმაციაზე დაწყებული გამოძიებას ახალ წლამდე ითხოვენ. წინააღმდეგ შემთხვევაში ისინი თვითდაზიანებებით იმუქრებიან.

გაზეთმა "კვირის პალიტრამ" ჩაატარა გამოძიება იმის დასადგენად, თუ ვინ იყო ის პატიმარი, რომლის შეწყალების სანაცვლოდ ლამის ორ მილიონამდე დოლარს იხდიდნენ და რომელი პოლიტიკოსები ახდენდნენ ზეწოლას შეწყალების კომისიის მაშინდელ თავმჯდომარეზე. მათი ინფორმაციით, კვალი ე. წ. კოკაინის საქმემდე მიდის.

შსს-ს ოფიციალური ინფორმაცი­ით,2010 წლის 2 ივნისს ქუთაისსა და თბილისში შინაგან საქმეთა სამინისტრომ დააკავა საერთაშორისო ნარკოკარტელის 5 წევრი: ანასტასია ზაუტაშვილი, მევლუდ სვანიძე, რომან მუსემიანი, გიორგი ჩეჩელაშვილი და თენგიზ გურჩიანი. საბერძნეთის მოქალაქე და ესპანეთში მცხოვრები ნუგზარ ბოჭორიშვილი ამ ჯგუფს რეგულარულად უგზავნიდა ჯართს პანამიდან, პერუდან და კოლუმბიიდან. დღეს კობახიძემ დაადასტურა, რომ ე.წ. კოკაინის საქმეზე დაკავებულების შეწყალებას ითხოვდა.