მთავარი პროკურორის ირაკლი შოთაძის ინფორმაციით, ბესიკ ხარძიანის მკვლელობის საქმეზე ყველა გარემოება დადგენილია. როგორც გაზეთ „პრაიმტაიმთან“ საუბრისას შოთაძემ განაცხადა, საქმის შესახებ საზოგადოება ინფორმაციას მალე მიიღებს.

„არათუ ვერსიები არსებობს, დადგენილია ყველა გარემოება. გამოძიებაზე მიღებულია კონკრეტული გადაწყვეტილებები, რომელზეც ამ ეტაპზე ვერ ვისაუბრებ. ცნობილია კონკრეტული პიროვნებები, რომელთა შესახებაც საზოგადოებას უახლოეს მომავალში ვაცნობებთ“, - აღნიშნა შოთაძემ.

მთავარმა პროკურორმა კომენტარი ეროსი კიწმარიშვილის და ზურაბ ჟვანიას საქმესთან დაკავშირებითაც გააკეთა.

„კიწმარიშვილის საქმეზე ძალიან მალე შედეგებს გავასაჯაროვებთ. კიწმარიშვილის ოჯახთან გრძელდება კომუნიკაცია და როგორც შევპირდი საზოგადოებას, აუცილებლად სრულად გავასაჯაროვებთ მასალებს... რაც შეეხება ჟვანიას საქმეს, კონკრეტული პირების მიმართ უკვე არსებობს გამამტყუნებელი განაჩენი, თუმცა ეს საკმარისი არ არის. საბოლოოდ უნდა გაეცეს პასუხი, თუ რა მოხდა იმ ავადსახსენებელ დღეს. უნდა გავითვალისწინოთ, რომ ძალიან დიდი დროა გასული. იმდროინდელმა გამოძიებამ არ მიიღო ყველა ზომა, რომ რეალობა დადგენილიყო. პრაქტიკულად, ყველაფრის გაკეთება თავიდან გვიწევს. ეს ძალიან რთული და დროში გაწელილი პროცედურებია“, - განაცხადა შოთაძემ.