ოზურგეთის მუნიციპალიტეტის დაბა ნასაკირალის ცენტრში მდებარე ორსართულიან საცხოვრებელ კორპუსს, ერთი ნაწილი ჩამოეშალა. შემთხვევა წუხელ მოხდა. მომხდარის შედეგად არავინ დაშავებულა.

როგორც „ნიუპოსტს“ კორპუსში მაცხოვრებმა, გულო რამიშვილმა განუცხადა, შენობა ამორტიზირებულია და მის შესაკეთებლად თხოვნით ბოლო სამი წლის მანძილზე ხელისუფლებას არაერთხელ მიმართეს, თუმცა უშედეგოდ. აღნიშნულ კორპუსში რვა ოჯახი ცხოვრობს.

"ღამის ოთხ საათზე გამეღვიძა, ბავშვმა წყალი მომთხოვა და ავდექი წყლის მოსატანად. ამ დროს უცნაური ხმა გავიგე. ქარი მეგონა. რომ გამოვედი, მეორე ოთახში ქვები ცვიოდა. რამდენიმე ოთახს კარები მოძვრა და ქვევით ჩავარდა, კედლებიც გამოინგრა. ჭერიც რომ ჩამოვარდა, მივხვდი სახლი ინგრეოდა, გავაღვიძე ყველა. დავიწყე ყვირილი, ხალხს საშველად ვუხმობდი. სამი პატარა ბავშვი გვყავს ოჯახში, სასწრაფოდ გავიყვანეთ გარეთ. ხელისუფლებას რამდენჯერმე მივმართე, ბოლოს ვთხოვე ცემენტი მაინც მომეცით მე თვითონ გავამაგრებმეთქი, მაგრამ ყურადღება არავინ მომაქცია. სახლი ორი სამი წელია დაბზარულია. დღესაც, ამ დილით, დავურეკეთ გამგებელსა და მის მოადგილეს და ჯერ არავინ არ მოსულა. ამბობენ, დღეს კვირაა, დასვენებააო. ხვალ მივალ და კიდევ დავწერ განცხადებას"-გვიყვება გულო რამიშვილი.

თეა იოსელიანი, გურია