"ეს საქმე პოლიტიკური დევნის გაგრძელებაა" - ადვოკატი პროკურატურის ბრალდებას უსაფუძვლოს უწოდებს

სამართალი - 17:20, 11 Dec, 2015

1577

წამებაში ბრალდებულის დათა ახალაიას ადვოკატი მალხაზ ველიჯანაშვილი მისი დაცვის ქვეშ მყოფის წინააღმდეგ გამოთქმულ ბრალდებას აბსურდულს უწოდებს.

მისი ინფორმაციით, პროკურატურა ყოფილი მაღალჩინოსნების მიმართ პოლიტიკურ დევნას აგრძელებს.

„ეს საქმე პოლიტიკური დევნის გაგრძელებაა. სხვა შეფასება არ შეიძლება ჰქონდეს იმას, რომ ჯაშუშებს დაზარალებულად აცხადებენ, ეს ადამიანები ყველაფერს აკეთებდნენ, რომ ქვეყანაში წესრიგი ყოფილიყო. ელბერდ კობერიძე არის ჯაშუში. ის ჯაშუშობაში იმხილებოდა, ასევე სხვადასხვა დანაშაულებში სასჯელი აქვს მოხდილი და საპროცესოებიც აქვს გაფორმებული, ის არის ჩვეულებრივი კრიმინალი“, - ამბობს ველიჯანაშვილი.

შეგახსენებთ, ელბერდ კობერიძის წამების ფაქტზე სისხლის სამართლის პასუხისგებაში მიეცნენ თავდაცვის მინისტრის ყოფილი მოადგილე დავით ახალაია, გენერალური შტაბის უფროსის ყოფილი მოადგილე გიორგი კალანდაძე, სამხედრო პოლიციის დეპარტამენტის ყოფილი უფროსი მეგის ქარდავა და შსს კონსტიტუციური უსაფრთხოების დეპარტამენტის აფხაზეთის ავტონომიური რესპუბლიკის მთავარი სამმართველოს ყოფილი უფროსი რომან შამათავა, ხოლო შს სამინისტროს სამეგრელო-ზემო სვანეთის სამხარეო პოლიციის ყოფილი თანამშრომელი გიორგი სამუშია დაკავებულ იქნა ბრალდებულის სახით.