მთავარ პროკურატურაში საკრებულოს დამოუკიდებელი დეპუტატის ალეკო ელისაშვილის დაკითხვა მიმდინარეობს. ელისაშვილი საგამოძიებო უწყებაში ცოტა ხნის წინ მივიდა.

პროკურატურას შეკითხვები ელისაშვილის მიერ გუშინ გავრცელებულ ინფორმაციაზე ექნება.

როგორც დეპუტატმა პროკურატურაში შესვლამდე განაცხადა, შეწყალების კომისიის თავმჯდომარედ ყოფნის პერიოდში მასზე განხორციელებულ ზეწოლაზე ინფორმაცია ერთი წლის წინ გიორგი ბადაშვილს მიაწოდა, თუმცა შედეგი ამას არ მოჰყოლია.

„წელიწადნახევრის წინ ვუთხარი პროკურატურას ამ პოლიტიკოსების სახელები და გვარები. იმ ხალხის სახელები და გვარები, ვინც ფულს იღებდა და ყური არ შეიბერტყა ბატონმა ბადაშვილმა. არ გაინტერესებთ მოძებნოთ გიორგი ბადაშვილი, რომელიც უზარმაზარ ფულს იღებდა იმაში, რაც არ გააკეთა. მას უნდა გამოეძიებინა ყველაფერი. რატომ გაატარა ერთი ყურიდან მეორე ყურში ჩემს მიერ მიწოდებული ინფორმაცია. საუბარია "ქართული ოცნების" ძალიან გავლენიან პოლიტიკოსებზე. ყველაფერს ვიტყვი დაკითხვისას. დღეს ერთმა ადამიანმაც დამირეკა და მითხრა, რომ მზად არის ჩვენება მისცეს. ის ინფორმირებული იყო ამ ყველაფერთან დაკავშირებით. ვნახოთ აიტკივებენ თუ არა ეხლა თავს", - განაცხადა ელისაშვილმა.