მთავარი პროკურორი ირაკლი შოთაძე მოქალაქეებთან შეხვედრის დღეს აწესებს. ამის შესახებ შოთაძემ მისი უწყების სხვადასხვა რგოლების ხელმძღვანელებთან შეხვედრის დროს განაცხადა.

მისი თქმით, იმისთვის რომ პროკურატურა განვითარდეს ერთ-ერთი აუცილებელი პირობაა ურთიერთობა საზოგადოებასთან.

შოთაძემ პროკურორების დამოუკიდებლობის გაზრდაზე და კვალიფიკაციის ამაღლებაზეც ისაუბრა.

„მნიშვნელოვანია საზოგადოებასთან და ჩვეულებრივ მოქალაქეებთან ურთიერთობა. ვაპირებთ უახლოეს მომავალში შესაბამისი ღონისძიებების გატარებას. თითოეული რაიონული ოლქის პროკურორთან მოქალაქეებს გამოეყოფათ ღია კარის დღე, რა დროსაც შესაძლებლობა ექნებათ შეხვდნენ მათ. ასევე ვაპირებ დავაწესო კონკრეტული დღე, როცა მოქალაქეებს ექნებათ პირადად ჩემთან შეხვედრის შესაძლებლობა", - განაცხადა ირაკლი შოთაძემ.