"უბედურება დაგვატყდა თავს"- სოზარ სუბარის მეუღლე ავარიის შესახებ

შემთხვევა - 13:34, 02 Dec, 2015

14767

ლტოლვილთა და განსახლების მინისტრის, სოზარ სუბარის მეუღლე თამთა ყუბანეიშვილი აბაბაშაში მომხდარი ავტოსაგზაო შემთხვევის შესახებ სოციალურ ქსელ "ფეისბუკში" წერს.
მინისტრის მეუღლე ავარიის შედეგად გარდაცვლილის ოჯახს სამძიმარს უცხადებს.

ყუბანეიშვილის ინფორმაციით, შემთხვევა აბაშაში, სოფელ მარანში რკინიგზის გადასასვლელთან მაშინ მოხდა, როცა დევნილთა მინისტრი სამეგრელოში მივლინებით მიემგზავრებოდა.
"უბედურება დაგვატყდა თავს, არავინ ვართ შემთხვევითობისგან დაზღვეულები...გუშინ ღამით, წვიმიან ამინდში ავტოსაგზაო შემთხვევა მოხდა აბაშაში, სოფელ მარანში რკინიგზის გადასასვლელთან. ავტოსაგზაო შემთხვევას ემხვერპლა 68 წლის ემზარ ხონელიძე. დედაჩემის სახელთან ერთად მის სახელს ყოველთვის მოვიხსენიებ ლოცვებში. ღმერთმა გაანათლოს მისი სული. სამძიმარს ვუცხადებ დაღუპულის ოჯახს.
სოზარი მივლინებით მიდიოდა სამეგრელოში. მძღოლი და სოზარი მსუბუქად არიან დაშავებულები"- წერს სოზარ სუბარის მეუღლე.

შინაგან საქმეთა სამინისტროში მომხდარის შესახებ გამოძიება სსკ-ის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.