"ოქრიკას" საქმეზე ნაფიც მსაჯულთა ახალი შემადგენლობა შერჩეულია

სამართალი - 17:49, 30 Nov, 2015

1298

თბილისის საქალაქო სასამართლოში დასრულდა ნაფიც მსაჯულთა ახალი შემადგენლობის შერჩევა ლაშა მახარაძის დამამძიმებელ გარემოებებში განზრახ მკვლელობის ფაქტზე, ბრალდებულ გიორგი ოქროპირიძის ბრალდების სისხლის სამართლის საქმეზე. ინფორმაციას საქალაქო სასამართლო ავრცელებს.
"გიორგი ოქროპირიძეს ბრალად ედება ლაშა მახარაძის განზრახ მკვლელობა დამამძიმებელ გარემოებაში, კერძოდ - არაერთგზის; მასვე ბრალად ედება ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა, ტარება.
სასამართლოს განჩინებით ნაფიც მსაჯულთა შერჩევა დახურულ სასამართლო სხდომებზე მიმდინარეობდა. პროცესის მონაწილეებთან ერთად, შერჩევის სხდომებს დაზარალებულის უფლებამონაცვლეც ესწრებოდა.

ნაფიც მსაჯულთა შერჩევის სხდომაზე გამოცხადებულ კანდიდატთაგან შეირჩა 12 ნაფიცი მსაჯული და 3 სათადარიგო მსაჯული.

მოსამართლის განჩინებით ფოტო, კინო, ვიდეო გადაღება და აუდიო ჩაწერა სასამართლო განხილვების დასრულებამდე შეზღუდულია. აღნიშნული გადაწყვეტილება სასამართლომ ნაფიც მსაჯულებზე საზოგადოებრივი აზრის ზეგავლენის საფრთხის თავიდან აცილების მიზნით მიიღო. სასამართლომ იხელმძღვანელა ადამიანის უფლებათა ევროპული კონვენციით, რომლის მე-6 მუხლის თანახმად, მთელ სასამართლო პროცესზე ან მის ნაწილზე პრესა და საზოგადოება შეიძლება არ დაუშვან თუ სასამართლოს აზრით ეს მკაცრად აუცილებელია განსაკუთრებული გარემოებების არსებობისას, როდესაც საქვეყნოობა ზიანს აყენებს მართლმსაჯულების ინტერესებს.
მიუხედავად აღნიშნული შეზღუდვისა, საქმის არსებითი განხილვა გაიმართება ღია სასამართლო სხდომბზე და ნებისმიერ დაინტერესებულ პირს მიეცემა შესაძლებლობა თვალყური ადევნოს პროცესის მიმდინარეობას.
სისხლის სამართლის საქმის არსებით განხილვა, 2015 წლის 3 დეკემბერს 11:00 საათზე დაიწყება", - ნათქვამია განცხადებაში.