"გვიყვირით ისე, რომ რამდენჯერმე კინაღამ მანტიიდან ამოხტით"- ხმაური სასამართლო დარბაზში

სამართალი - 18:53, 26 Nov, 2015

2677

ნარკოდანაშაულისთვის ბრალდებული მსახიობის ირაკლი რამიშვილის წინასასამართლო სხდომა ჯარიმებისა და ხმაურის ფონზე მიმდინარეობდა.

საქალაქო სასამართლოს მოსამართლე ვახტანგ მრელაშვილმა, ჯერ მსახიობის მხარდასაჭერად მისული დავით ტურაშვილი 200 ლარით დააჯარიმა, ადვოკატი ირმა ჭკადუა კი დარბაზიდან გააძევა.

ირმა ჭკადუასა და მოსამართლეს შორის შელაპარაკება მაშინ მოხდა, როდესაც ადვოკატი მოსამართლე მრელაშვილის აცილებაზე შუამდგომლობას აყენებდა.

"ცუდად იქცევით გვიყვირით ისე, რომ რამდენჯერმე კინაღამ მანტიიდან ამოხტით. თუ მკურნალობა გჭირდებათ იმკურნალეთ"- მიმართა ადვოკატმა მოსამართლეს, რის შემდეგაც ის მოსამართლემ გააძევა კიდეც.

სხდომათა დარბაზში ხმაური მას შემდეგ დაიწყო, რაც მოსამართლემ არ დააკმაყოფილა მსახიობის ადვოკატების შუამდგომლობა პროკურატურის მტკიცებულებების დაუშვებლობასთან დაკავშირებით. ირაკლი რამიშვილის ადვოკატები თვლიან, რომ მტკიცებულებები უკანონოდ არის მოპოვებული.

"მოსამართლე ვახტანგ მრელაშვილი არათუ მიკერძოებულია, არამედ დღეს მან გააუპატიურა სისხლის სამართლის საპროცესო კოდექსი , -ეს განცხადება ირაკლი რამიშვილის ადვოკატმა ირმა ჭკადუამ სასამართლო დარბაზიდან გაძევების შემდეგ გააკეთა.

"მთავარი არის ის, რომ ირაკლი რამიშვილის ჩხრეკის შედეგად ამოღებულ ნივთიერებაზე გამომძიებლები, რომლებიც დაიკითხნენ, ამბობდნენ, რომ ეს იყო მოთეთრო ფერის გრანულებიანი ნივთიერება. ექსპერტებმა კი გახსნეს და აღნიშნული ნივთიერება წარმოადგინეს, როგორც მცენარეული, მოყავისფრო ფერის ნივთიერება. მოსამართლემ კი თქვა, რომ ერთი და იგივეა ეს. ამის შემდეგ როგორ შეიძლება ჩაითვალოს ის მიუკერძოებელ და ობიექტურ მოსამართლედ. ის არათუ მიუკერძოებელია, არამედ საერთოდ არ იცის რა წერია სისხლის სამართლის საპროცესო კოდექსში. მან დღეს გააუპატიურა საპროცესო კოდექსი", - განაცხადა ირმა ჭკადუამ.

შეგახსენებთ, რომ მსახიობი ირაკლი რამიშვილი 11 ოქტომბერს დიდი ოდენობით ნარკოტიკული საშუალების შეძენა-შენახვის ბრალდებით დააკავეს. ოჯახის წევრები ამბობენ, რომ მსახიობს ნარკოტიკული საშუალება ჩაუდეს.