თავაზიანი ფორმალობა დავიცავით - ელისაშვილის პროკურატურის არ სჯერა

სამართალი - 17:21, 26 Nov, 2015

2018

საკრებულოს დამოუკიდებელი დეპუტატის ალეკო ელისაშვილის დაკითხვა დასრულდა. როგორც ელისაშვილის სოციალურ ქსლეში წერს, გამოძიებას მის მიერ გავრცელებულ ინფორმაციასთან დაკავშირებით დამატებითი დეტალები მიაწოდა.

„გამოვედი პროკურატურიდან. ჩვენება ჩამომართვეს. თავაზიანი ფორმალობა დავიცავით მეც და გამომძიებელმაც. გარკვეული დეტალები ვუთხარი, მნიშვნელოვანი ინფორმატორების ვინაობა რა თქმა უნდა არ მითქვამს - ვინც მე მენდობა და ჩემს უსაფრთხოებაზე სერიოზულ ცნობებს მაწვდის ის რა თქმა უნდა ჩემგან ცხრაკლიტულით იქნება დაცული. ასეთ ხალხს არც მე ვუმტყუნებ ნდობას. რა თქმა უნდა არ მჯერა რომ პროკურატურას რეალურად რამეს გამოიძიებს, რა თქმა უნდა პროკურატურა ვერ წავა მოქმედი და ყოფილი პრემიერების წინააღმდეგ ვისი ვიზირებითაც ხდება ეს ყველაფერი ჩემი ღრმა რწმენით და არამხოლოდ რწმენით.... ისე კი არაფერი მელანდება და არაფერი მომჩვენებია, თითქმის წელიწადია ეს თვალთვალი და მიყურადება გრძელდება და როგორც ხედავთ მხოლოდ ახლა ვთქვი. მე ჩემი, ჩემი ოჯახის და დიახაც ჩემი ქვეყნის უსაფრთხოება მალაპარაკებს. სუს-მა ჩემს დევნას თავი დაანებოს და ამ ქვეყნის რეალურ მტრებს სდიოს და უთვალთვალოს აჯობებს. ამის თქმა მინდოდა მათთვის ამ ყველაფრის გახმაურებით“, - წერს ელისაშვილი.

ალეკო ელისაშვილმა გაზეთ „რეზონანსთან“ საუბრისას განაცხადა, რომ უკვე რამდენიმე თვეა, უთვალთვალებენ და უსმენენ. ეს ინფორმაცია კი, მისი თქმით, რამდენიმე წყაროდან აქვს. მათ შორის უცხოელი კეთილისმსურველებისაგან და საელჩოებიდან.