"მოძალადე პოლიციელი აქამდე უნდა დაეკავებინათ" - მდინარაძის პირველი კომენტარი კვირკვაიას დაკავებაზე

სამართალი - 13:53, 13 Nov, 2015

2532

ადვოკატი გიორგი მდინარაძე მისი ცემის ფაქტზე ბრალდებული შს სამინისტროს ვაკე-საბურთალოს სამმართველოს მე-5 განყოფილების უფროსის ლაშა კვირკვაიას დაკავების ფატქს მიესალმება, თუმცა იქვე ამბობს, რომ შესაძლებელია „მოძალადე პოლიციელის“ დაკავება დაგვიანებულია.

ადვოკატმა კვირკვაიას დაკავების ფაქტი „ნიუპოსტისგან“ გაიგო.

„მოძალადე პოლიციელი აქამდე უნდა დაეკავებინათ, ვშიშობ რომ ლაშა კვირკვაიას დაკავება დაგვიანებულია. ვეჭვობ, რომ მან თანამშრომლებზე ზეგავლენის მოხდენა უკვე მოასწრო, რის შემდეგაც მათ არასწორი ჩვენება მისცეს. რაც შეეხება ზოგადად პროკურატურის გადაწყვეტილებას, მას მივესალმები, ალბათ უწყება მივიდა იმ დასკვნამდე, რომ იყო საკმარისზე მეტი მტკიცებულებები, რაც დაკავების საფუძველი გახდა“ - აღნიშნა ადვოკატმა.

გიორგი მდინარაძე ამბობს, რომ კვირკვაიას თანამონაწილეებიც უნდა დაისაჯონ.

„სიმართლე გითხრათ ისეთ აქტიურ ძალადობას როგორც ეს ახორციელებდა სხვები არ ჩადიოდნენ, არ მახსოვს დამარტყა თუ არა ვინმემ ლაშა კვირკვაიას გარდა, თუმცა დახმარება არსებობს სისხლის სამართალში სხვადასხვა სახის. ხელის შეწყობა, ინტელექტუალური დახმარება, ჩემ შემთხვევაში იყო ფიზიკური დახმარება, რომ განყოფილების უფროსს გაადვილებოდა ჩემი ცემა“ - დასძინა გიორგი მდინარაძემ.

ოფიციალური ინფორმაციის თანახმად, "საქართველოს პროკურატურის მიერ ჩატარებული საგამოძიებო მოქმედებების შედეგად ადვოკატ გიორგი მდინარაძის მიმართ განხორციელებული ძალადობის ფაქტზე მიმდინარე გამოძიების ფარგლებში, სასამართლოს მიერ გაცემული განჩინების საფუძველზე, ბრალდებულის სახით დაკავებულია შს სამინისტროს ვაკე-საბურთალოს სამმართველოს მე-5 განყოფილების უფროსი ლაშა კვირკვაია, საქართველოს სსკ-ის 333-ე მუხლის მე-3 ნაწილის „ბ“ ქვეპუნქტით, რაც გულისხმობს სამსახურებრივი უფლებამოსილების გადამეტებას, ჩადენილს ძალადობით“.