ავტოსაგზაო შემთხვევის შედეგად მტკვარში გადავარდნილ ავტომობილში მყოფ გოგონას მაშველები ამ დრომდე ეძებენ.

ამის შესახებ „ნიუპოსტს“ საგანგეო სიტუაციების მართვის სააგენტოს პრესსამსახურში განუცხადეს.

"ორი დღის წინ, მშვიდობის ხიდთან მოხდა ავტოსაგზაო შემთხვევა. ადგილზე მობილიზებული იყვნენ საგანგებო სიტუაციების მართვის სააგენტოს მაშველები. შემთხვევის ადგილზე მდინარე მტკვრიდან ამოყვანილია ერთი გარდაცვლილი, ერთი ადამიანი მოვათავსეთ ინგოროყვას კლინიკაში და ახალგაზრდა გოგონას სამძებრო სამუშაოები ამ წუთებშიც შეუჩერებლად მიმდინარეობს. მდინარე მტკვირდან ასევე ამოღებულია ავტომანქანა, სადაც აღნიშნული ადამიანები ისხდნენ", - აცხადებენ საგანგებო სიტუაციების მართვის სააგენტოს პრესსამსახურში.

როგორც ცნობილია, გოგონას ოჯახის წევრები სამაშველო სამსახურის მიმართ უკმაყოფილებას გამოთქვამენ და ამბობენ, რომ სამუშაოები სრული დატვირთვით არ მიმდინარეობს. მაშველების განმარტებით კი, სამძებრო სამუშაოები ცუდი ხილვადობის გამო ფერხდება.

შეგახსენებთ, მშვიდობის ხიდთან ავარია ორი დღის წინ მოხდა. მანქანა მდინარეში გადავარდა. შემთხვევის შედეგად ერთი ადამიანი გარდაიაცვალა, ერთი კი ამ დრომდე სამედიცინო დაწესებულებაში იმყოფება.