ხალვაშის სახელზე წილების აღრიცხვა სასამართლოს ყველა ინსტანციის გავლის შემდეგ მოხდება

ხალვაშის სახელზე წილების აღრიცხვა სასამართლოს ყველა ინსტანციის გავლის შემდეგ მოხდება - სალია

სამართალი - 18:07, 03 Nov, 2015

1781

ქიბარ ხალვაშის ადვოკატის პაატა სალიას განცხადებით, ქიბარ ხალვაშის სახელზე წილების აღრიცხვა, მხოლოდ მას შემდეგ გახდება შესაძლებელი, რაც აღნიშნული გადაწყვეტილება ყველა სასამართლო ინსტანციას გაივლის. ამასთანავე ქიბარ ხალვაშის უფლებადამცველი არ გამორიცხავს, რომ სააპელაციო სასამართლოში მოსამართლის გადაწყვეტილების გასაჩივრება მათი მხრიდანაც მოხდეს.

„ჩვენთვის ყველა მოთხოვნა მნიშვნელოვანი იყო, შვიდი მოთხოვნიდან დაკმაყოფილდა მხოლოდ ორი. ერთი მოთხოვნა არის შპს გეოტრანსთან და საქცემენტთან ხელშეკრულებების ბათილად ცნობა, ამის შედეგად დაკმაყოფილდა მეორე მოთხოვნაც და დღევანდელი მესაკუთრეების საკუთრების უფლება გაუქმდა. საჯარო რეესტრში „რ2“-ის 60 %-ის მესაკუთრედ უნდა აღირიცხოს ქიბარ ხალვაში, ხოლო 40 %-ის მესაკუთრედ მისი კომპანია „პანორამა“ - განაცხადა სალიამ. მისი თქმით ქიბარ ხალვაშის სახელზე წილების აღრიცხვა მოხდება მას შემდეგ რაც სასამართლოს გადაწყვეტილება ყველა ინსტანციას გაივლის და შევა ძალაში. სალია დარწმუნებულია, რომ მოპასუხე მხარე აღნიშნულ გადაწყვეტილებას სააპელაციო და უზენაეს სასამართლოებში გაასაჩივრებს. ამასთანავე სალია არ გამორიცხავს, რომ სააპელაციო სასამართლოში გადაწყვეტილება მათაც გაასაჩივრონ, რადგან მოსამართლის მხრიდან მათი სარჩელის მხოლოდ 2 პუნქტი დაკმაყოფილდა და 5-ზე უარი ეთქვათ.