"სოსანაშვილს სამუდამო პატიმრობა ემუქრება და ცდილობს საზოგადოება შეცდომაში შეიყვანოს"

სამართალი - 20:10, 02 Nov, 2015

2470

საქართველოს მთავარი პროკურატურა იური ვაზაგაშვილის მკვლელობაში ბრალდებული გია სოსანაშვილის მიერ დღეს სასამართლო სხდომაზე გაკეთებულ განცხადებას, რომლის მიხედვითაც მთავარი პროკურორის მოადგილე ირაკლი შოთაძე აღიარების სანაცვლოდ მას ოჯახის უზრუნველყოფას ჰპირდებოდა. სიცრუეს უწოდებს.

როგორც უწყების საზოგადოებასთან ურთიერთობის სამსახურის ხელმძღვანელმა ნათია სუხიაშვილმა "ნიუპოსტს" განუცხადა, "სიცრუეზე კომენტარს ვერ გააკეთებს".
მოგვიანებით კი სუხიაშვილმა შემდეგი შინაარსის მოკლეტექსტური შეტყობინება გამოგვიგზავნა:
"სოსანაშვილს სამუდამო პატიმრობა ემუქრება და ცდილობს მსგავსი სახის განცხადებებით საზოგადოება შეიყვანოს შეცდომაში".
ცნობისთვის, საქალაქო სასამართლოში იური ვაზაგაშვილის მკვლელობაში ბრალდებულმა გია სოსანაშვილმა დასკვნითი ჩვენების მიცემისას აღნიშნა, რომ მთავარი პროკურორის მოადგილე ირაკლი შოთაძე, რომელიც მთავარი პროკურორის ერთ-ერთი კანდიდატია მასთან საკანში შევიდა და მკვლელობის შემკვეთან იკარლი ფირცხალავას დასახელება სთხოვა.

“მიმაბეს რკინის მაგიდაზე, შემოვიდა მამუკა ვასაძე და განმიცხადა, რომ აფეთქების შედეგად დარჩენილ ხელყუმბარის სახელურზე დარჩნილი იყო დნმ-ის კვალი, რომელიც მე მეკუთვნოდა. ვუთხარი, რომ დანაშაული მე არ ჩამიდენია და რატომ მაბრალებთ-თქო. მითხრა იმიტომ, რომ 20 თებერვალს დაგირეკა ირაკლი ფირცხალავამო. შემდეგ შემოვიდა შოთაძე და მითხრა, თქვი, რომ ეს ყველაფერი ფირცხალავამ დაგავალა, შენ მოგისჯით რაღაც წლებს და სამაგიეროდ, შენი ოჯახი იქნება უზრუნველყოფილი და უსაფრთხოდო". - თქვა სოსანაშვილმა.

იური ვაზაგაშვილი მიმდინარე წლის 20 იანვარს კასპის რაიონში, სოფელ ყარაფილაში, შვილის, ზურაბ ვაზაგაშვილის სასაფლაოსთან მომხდარი აფეთქების შედეგად გარდაიცვალა.

მომხდარიდან მალევე მოქმედი პოლიციელი გია სისანაშვილი მკვლელობის ბრალდებით დააკავეს, თუმცა ჩადენილ დანაშაულს ეს უკანასკნელი დღმდე არ აღიარებს.