არასამთავრობო ორგანიზაცია „სამართალდამცავთა დაცვის ლიგა“ მოუწოდებს საგამოძიებო ორგანოს დაუყოვნებლივ დაიწყოს გამოძიება გია სოსანაშვილის მიერ, დღეს სასამართლო სხდომაზე გაცხადებულ ფაქტთან დაკავშირებით. სოსანაშვილის განცხადება აღნიშნულ ფაქტთან დაკავშირებით შეიცავს დანაშაულის ნიშნებს. ყოველივე ეს ადასტურებს, რომ თვეების განმავლობაში და დღესაც მიმდინარეობს პოლიციის ოფიცრის ირაკლი ფირცხალავას და მისი კოლეგების დისკრედიტაცია პოლიტიკური ნიშნით.

შეგახსენებთ, რომ დღეს სასამართლო სხდომაზე საკუთარ დასკვნით სიტყვაში ბრალდებულმა გია სოსანაშვილმა პროკურატურის მხრიდან განხორციელებულ ზეწოლაზე ისაუბრა. „პროკურატურაში 12 საათის განმავლობაში მკითხავდნენ. მითხრეს, რომ ფალიაზე აღმოჩენილი დნმ მე მეკუთვნოდა. შენ მოკალიო. მე ვუთხარი, რომ არ ჩამიდენია ეს დანაშაული-თქო. სადაც გინდა იქ იჩევლეო, უკვე არაფერი გეშველებაო. თავიდან ეს ყველაფერი ხუმრობა მეგონა. რამდენიმე საათში შემოვიდა პროკურორის მოადგილე ირაკლი შოთაძე. იგივე მითხრა. გამომძიებელი მეუბნებოდა, რომ ეს ყველაფერი ვითომ ირაკლი ფირცხალავამ დაგავალა, თქვიო. შენ რამდენიმე წელს მოგისჯიო. სამაგიეროდ, შენი ოჯახი იქნება უზრუნველყოფილიო. ამაზე არ დავთანხმდი. ირაკლი ფირცხალავას „ფეისბუქით“ ვიცნობდი. როგორ დამებრალებინა დანაშაული, რომელიც მე არ ჩამიდენია“, - განაცხადა გია სოსანაშვილმა.