სასურველი იქნებოდა ხალვაში სასამართლოში ივანიშვილთან ერთად მოსულიყო

სასურველი იქნებოდა ხალვაში სასამართლოში ივანიშვილთან ერთად მოსულიყო - ზაზა ბიბილაშვილი

სამართალი - 16:26, 02 Nov, 2015

1427

მოსამართლე ურთმელიძის მიერ „რუსთავი2“-ის დაცვის მხარის შუამდგომლომლობებზე უარის თქმასთან დაკავშირებით კომენტარი ადვოკატმა ზაზა ბიბილაშვილმა გააკეთა. მისი თქმით ბიძინა ივანიშვილის და ქიბარ ხალვაშის დაკითხვაზე მოსამართლის მხრიდან უარი მოსალოდნელი იყო, თუმცა დაცვის მხარემ აღნიშნული შუამდგომლობა იმის გამო დააყენა, რომ საზოგადოებისთვის კიდევ უფრო ნათელი გამხდარიო, თუ რა პროცესები მიმდინარეობს „რუსთავი 2“-ის საქმესთან დაკავშირებით.

„ჩვენ ვითხოვდით ბიძინა ივანიშვილის დაკითხვას იმ მოტივით, რომ ის თავად აცხადებდა ერთ-ერთ ინტერვიუში რომელიც 29 ოქტომბერს აიტვირთა იუთუბზე, რომ მისთვის ცნობილია თუ რა მოხდა, როგორ შეიძინა და როგორ გაყიდა ქიბარ ხალვაშმა წილები. აქამდე ეს გარემოება ჩვენთვის უცნობი იყო. იქიდან გამომდინარე რომ ქიბარ ხალვაში ჩამოვიდა საქართველოში, სასურველი იქნებოდა რომ ის მოსულიყო სასამართლოში ბიძინა ივანიშვილთან ერთად და ერთობლივად ჩამოეყალიბებინათ და დაეხატათ ის სურათი, რომელიც მათთვის არის ცნობილი. სმაწუხაროდ მოსამართლემ ჩათვალა, რომ ეს საქმესთან კავშირში არ იმყოფებოდა. ეს ცხადია მოსალოდნელი იყო, მაგრამ კიდევ ერთხელ გვინდოდა იმის დასადასტურებლად, რომ საზოგადოებისთვის ნათელი ყოფილიყო თუ რასთან გვაქვს საქმე“- განაცხადა ზაზა ბიბილაშვილმა.

შეგახსენებთ, „რუსთავი 2“-ის დაცვის მხარემ დღეს ბიძინა ივანიშვილის და ქიბარ ხალვაშის სასამართლოში დაბარების შუამდგომლობა დააყენა, თუმცა მოსამართლე თამაზ ურთმელიძემ აღნიშნული შუამდგომლობა არ დააკმაყოფილა.