რუსთავი 2-ის სარჩელის განსახილველად საკონსტიტუციო სასამართლოს 9 თვიანი ვადა აქვს

სამართალი - 15:38, 02 Nov, 2015

2486

რუსთავი 2-ისა და ტელეკომპანია საქართველოს იურისტების მიერ შეტანილი სარჩელის განსახილველად საკონსტიტუციო სასამართლოს 9 თვიანი ვადა აქვს, რაც ნიშნავს, რომ 9 თვის განმავლობაში არსებითი განხილვა უნდა მოხდეს.

კანონმდებლობის თანახმად, საბოლოო გადაწყვეტილების გამოცხადებისთვის კი, საკონსტიტუციო სასამართლოს ვადები გათვალისწინებული არ აქვს.

„კანონმდებლობის მიხედვით, არსებითი განხილვა 9 თვის ვადაში უნდა ჩატარდეს, ხოლო საბოლოო გადაწყვეტილების მიღებაზე კანონმდებლობით ვადები არ არსებობს,“ - აცხადებს საკონსტიტუციო სასამართლოს უფროსი მრჩეველი, გიორგი ლომთაძე.

საკონსტიტუციო სასამართლომ "რუსთავი 2"-ის სარჩელი წარმოებაში მიიღო და საქმის დაუყოვნებლივ აღსრულების ნორმის ამოქმედება შეაჩერა გადაწყვეტილების მიღებამდე.

საკონსტიტუციო სასამართლოს ტელეკომპანიის ადვოკატებმა სარჩელით 26 ოქტმბერს მიმართეს.

ტელეკომპანიის უფლებადამცველები იმ მუხლების გაუქმებას ითხოვდნენ, რომლებიც დაუყოვნებლივ აღსრულებას ითვალისწინებს.

რუსთავი 2 -ის იურისტები ფიქრობენ, რომ საპროცესო კოდექსის აღნიშნული მუხლები წინააღმდეგობაში მოდის კონსტიტუციის მუხლებთან, რის გამოც მათ არ ეძლევათ საშუალება კონსტიტუციურად მინიჭებული სამართლიანი სასამართლოს უფლებით ისარგებლონ.