საქართველოს შინაგან საქმეთა სამინისტრო, ტელეკომპანია "რუსთავი 2"- ის გენერალური დირექტორის ნიკა გვარამიას განცხადებას სპეციალური განცხადებით პასუხობს, და გვარამიას განცხადებას, რომლის მიხედვით, შსს-ს სპეციალური დანიშნულების რაზმები, ტელეკომპანიაში შეჭრის მიზნით, გადაყვანილია ყაზარმულ მდგომარეობაზე, სიცრუეს უწოდებს.

გთავაზობთ შს სამინისტროს ოფიციალურ განცხადებას:

"ტელეკომპანია „რუსთავი 2“-ის გენერალური დირექტორის ნ. გვარამიას განცხადება იმის თაობაზე, რომ იგი ფლობს უტყუარ ინფორმაციას, თითქოს შსს-ს სპეციალური დანიშნულების რაზმები, ტელეკომპანიაში შეჭრის მიზნით, გადაყვანილია ყაზარმულ მდგომარეობაზე, არის სრული სიცრუე და მიზანმიმართული დეზინფორმაცია.

ნ. გვარამიას მედია-მიმართვა ემსახურება მხოლოდ საზოგადოების შეცდომაში შეყვანასა და დაძაბულობის ესკალაციას.

კიდევ ერთხელ ხაზგასმით აღვნიშნავთ, რომ შინაგან საქმეთა სამინისტრო მოწოდებულია, რათა დაიცვას მოსახლეობის სიმშვიდე და უსაფრთხოება.

მივმართავთ ყველა დაინტერესებულ პირს, თავი შეიკავოს უსაფუძვლო და დაუდასტურებელი ინფორმაციის გავრცელებისაგან"- აღნიშნულია უწყების მიერ გავრცელებულ განცხადებაში.