"რა ღირს თქვენი მიკროფონი?" - სალიამ არ იცის რას ნიშნავს ტერმინი "საორიენტაციო ფასი"

სამართალი - 13:42, 28 Oct, 2015

3783

ქიბარ ხალავშის ადვოკატს პაატა სალიას საქმეზე დაკითხული ექსპერტის შოთა ივანაშვილის კვალიფიციურობაში ეჭვი არ ეპარება.

ამის შესახებ სალიამ საქალაქო სასამართლოში ჟურნალისტებთან საუბრისას განაცხადა.

ჟურნალისტებმა სალიას ჰკითხეს „რუსთავი 2“-ის იურისტების ინფორმაციის შესახებაც, რომლის მიხედვით, დოკუმენტი ემყარება იმ ინფორმაციას, რომელზე ხელმომწერი პირიც არ მუშაობდა „რუსთავი 2“-ში.

„ბუნებრივია, ჩვენ და „რუსთავი 2“-ის ადვოკატები სხვადასხვა პოიზციაზე ვართ. წარმოვადგენთ მოწინააღმდეგე მხარეს. „რუსთავი 2“ ცდილობდა დაემტკიცებინა, რომ დასკვნა არასათანადოდაა შედეგნილი. ექსპერტს არაერთი შეკითხვა დაუსვეს, ერთი და იგივე შეკითხვა. თუმცა ივანაშვილმა ამომწურავად უპასუხა მოპასუხე მხარეს“, - განაცხადა სალიამ.

მისი თქმით, შემდეგი ეტაპი იქნება მხარეთა პაექრობა და მხოლოდ იქ დააფიქსირებს თავის პოზიციას ქიბარ ხალვაშის მხარე.

კითხვაზე, რას ნიშნავს საორინეტაციო ფასი, სალია ამბობს, რომ ეს ტერმინი მისთვისაც უცნობია.

„საორინეტაციო ფასი - ბუღალტრული აღრიცხვის საერთაშორისო პრაქტიკაში არის თუ არა მსგავსი ტერმინი, ამას ვერ გეტყვით. მე არ ვარ ამის სპეციალისტი. საბაზრო ფასის ზუსტი განსაზღვრა ყოველთვის რთულია. უძრავი-მოძრავი ქონება რამდენი შეიძლება ღირდეს, ზუსტი ციფრის დადგენა ყოველთვის რთულია. ექსპერტის კვალიფიციურობას რაც შეეხება მას აქვს შესაბამისი სერთიფიკატი“, -ამბობს სალია.

კითხვაზე, რატომ ვერ დაასახელა ექსპერტმა კონკრეტული ფასი თუ რა ღიდრა „რუსთავი 2“-ის ქონება იმ პერიოდში რა პერიოდშიც ხალვაში დაობს სალიამ თქვა, რომ დასკვნაში მითითებულია კონკრეტული ფასი.

თუმცა ჟურნალისტის კითხვაზე რა ციფრზეა საუბარი, ადვოკატმა განაცხადა:

„რა ღირს თქვენი მიკროფონი? ზუსტი ციფრი დამისახელეთ. დასკვნაში საორიენტაციიო ფასი განისაზღვრა. ანუ ეს არის დაახლოებით ის ფასი, რა ფასიც იყო ბაზარზე იმ პერიოდში. ანუ სანამ თქვენ არ გაყიდით მიკროფონს არ იცით ზუსტი ფასი. შეგიძლიათ მხოლოდ თქვათ, რომ საორინეტაციო ფასი“, - განაცხადა სალიამ.