"რუსთავი 2"-ის ადვოკატები მტკიცებულებებიდან ექსპერტ ივანაშვილის დასკვნის ამოღებას ითხოვენ

სამართალი - 12:43, 28 Oct, 2015

2057

"რუსთავი 2"-ის იურისტმა თამთა დემურაშვილმა თბილისის საქალაქო სასამართლოში ექსპერტ ივანაშვილის დაკითხვის პარალელურად მედიასთან კომენტარი გააკეთა და თქვა, რომ ექსპერტის მიერ დადებული დასკვნა არაობიექტურია.

მისი თქმით, დასკვნა სავარაუდოდ ერთ დღეში იქნა დაწერილი.

„ამის გათვალისწინებით დავაყენებთ შუამდგომლობას, რომ მტკიცებულებების ნუსხიდან ექსპერტ ივანაშვილის მიერ დადებული დასკვნა ამოღებული იქნას. ექსპერტი ივანაშვილი აკეთებს ქიბარ ხალვაშის მხარის სასარგებლო განცხადებებს. ექსპერტი სრულიად უსუსური და არაკომპეტენტური ჩანს. მან ახალი ტერმინი შემოგვთავაზა, საორიენტაციო ფასთან დაკავშირებით. ასეთი განმარტება არსად არ არის. რჩება შთაბეჭდილება, რომ დასკვნა მომზადებულია ერთ სამუშაო დღეში მოსარჩელის სასარგებლოდ. აქედან გამომდინარე „რუსთავი 2“-ის მხარე დააყენებს შუამდგომლობას, რომ მტკიცებულებების ნუსხიდან ამოღებული იქნას“, - ამბობს დემურაშვილი.

საქალაქო სასამართლოში „რუსთავი 2“-ის საქმის განხილვა ამ წუთებში მიმდინარეობს. პროცესზე სამხარაულის ბიუროს ექსპერტი იკითხება, რომელმაც 2006 წლის მდგომარეობით ტელეკომპანიის ღირებულება შეაფასა. არსებობს ვარაუდი, რომ მოსამართლე თამაზ ურთმელიძე საქმეზე გადაწყვეტილებას დღეს გამოიტანს.