საქალაქო სასამართლოში ქიბარ ხალვაშის მხარდამჭერები არიან შეკრებილი. მათ შორის არის ყოფილი პოლიტპატიმარი, მომღერალ სოფო ბედიას ქმარი მიშა მესხი.

როგორც მესხმა "ნიუპოსტს" განუცხადა, ის ქიბარ ხალვაშის მეგობარია და პროცესზე მის მხარდასაჭერად მივიდა.

„სააკაშვილის ხელისუფლებამ „რუსთავი 2“ წაართვა ქიბარ ხალვაშს. მას წინა რეჟიმის დროს არა მხოლოდ ეს ტელეკომპანია, არამედ ბევრი ბიზნესი წაართვეს. ეს ყველაფერი განხორციელდა იმიტომ, რომ ხალვაშმა სააკაშვილის რეჟიმთან არ ითანამშრომლა“, - განაცხადა მიშა მესხმა.

მიშა მესხი დარწმუნებულია, რომ „რუსთავი 2“-ის გაჩერება ხელისუფლების ინტერესში არ შედის.

„ხელისუფლება ამ პროცესებთან არაფერ შუაშია. სამი წელი ჰქონდა ამ ხელისუფლებას, რომ გაეჩერებინა ტელეკომპანია, მაგრამ ეს არ გააკეთა. აღსდგა სასამართლო, მის მიმართ ნდობა გაჩნდა. ამ ადამიანმა შეიტანა განცხადება ქონების დასაბრუნებლად. ის თავისას ითხოვს. აქ არაფერს შუაშია არც ივანიშვილი და არც ღარიბაშვილი“, - განაცხადა მესხმა.