10 წუთში შეცვლილი გადაწყვეტილება და "უმუშევრობის გამო დაკავებული ახალგაზრდა"

სამართალი - 20:49, 20 Oct, 2015

3099

23 წლის მსახიობს სააპელაციო სასამართლოს მოსამართლემ პატიმრობა 10 წუთში მიუსაჯა. ირაკლი რამიშვილს გამოძიება ნარკოტიკული საშუალებების შეძენა-შენახვას ედავება.

სასამართლო დარბაზში განსასჯელმა თქვა რომ ე.წ ბიო პოლიციამ ჩაუდო. რამიშვილის ადვოკატის თქმით, ამის დამადასტურებელი ფაქტები არსებობს.

როგორც გაირკვა, არასაკმარისი მტკიცებულებების გამო რამიშვილს საქალაქო სასამართლომ 7 000 - იანი გირაო შეუფარდა, თუმცა მსახიობის მიმართ დამდგარი განაჩენი ზუსტად ერთ კვირაში, მოსამართლე სპარტაკ პავლიაშვილის ახალი განაჩენით შეიცვალა.
აღსანიშნავია, რომ დრეს მიღებულ გადაწყვეტილებას დაკავებულის ადვოკატი ვეღარ გაასაჩივრებს.

ახალგაზრდა სასამრთლო დარბაზშივე დააკავეს და საპატიმრო დაწესებულებაში გადაიყვანეს.
მოსამართლემ მკაცრი განაჩენის მიზეზად განსასჯელის უმუშევრობა და რამიშვილის პირობითი მსჯავრის ქვეშ ყოფნა დაასახელა.

თავად მსახიობი პროცესზე მოსამართლის დარწმუნებას იმაში რომ მისი დაკავება უკანონოდ ოხდა რამდენიმე წუთი ცდილობდა.

"მითხრეს, რომ პირობითი გაქვსო, ამოიღეს ბიო დამანახეს და დამიდეს, შენიაო განმიცხადეს"- თქვა 23 წის მსახიობმა.

იგივეს ამბობს დაკავებულის ადვოკატი მიხეილ რამიშვილიც, მისი თქმით, პოლიციამ ახალგაზრდას "ჭკვიანად მოქცევა ურჩია".

ადვოკატი ამბობს, რომ მოსამართლემ მისი დაცვის ქვეშ მყოფის მიმართ სასჯელის სახით პატიმრობა იმიტომ გამოიყენა, რომ მსახიობი ამჯერად დაუსაქმებელია.

პროკურატურის წარმომადგენლის განცხადებით, კი რამიშვილისთვის ნარკოტიკული საშუალების ჩადების ფაქტი არ დასტურდება.

შვილის დაკავების შესახებ კომენტარი გააკეთა სოფიო ჩხენკელმა მისი თქმით, ირაკლი რამიშვილი პოლიციამ 13 ოქტომბერს დააკავა.

როგორც ჩხენკელი ამბობს, სახლში ჩხერეკაზე მისულმა პოლიციელებმა თქვეს რომ ახალგაზრდა პოლიციისთვის წინააღმდეგობის ბრალდებით დააკავეს, მოგვიანებით კი ეს ვერსია არაერთხელ შეიცვალა.
"ვთვლი, რომ რახან იარაღი ვერ უპოვეს სახლში, შემდეგ ჩაუდეს ნარკოტიკი" - ამბობს დაკავებულის დედა.