ე.წ. „კორტების სპეცოპერაციის“ დღევანდელ სასამართლო პროცესზე დაცვის მხარის მოწმეები დაიკითხნენ, კერძოდ, ყოფილი პოლიციელები გიორგი ხიზანიშვილი და ვაჟა ლომიძე.

„გიორგი ხიზანიშვილის ჩვენებით დასტურდება, რომ ვაზაგაშვილის მართვის ქვეშ მყოფი ავტომანქანის უკანა სალონში გასროლა განხორციელდა. მისივე ჩვენებით დასტურდება, რომ ვაზაგაშვილის ავტომანქანაში წინა მარჯვენა ფეხის საფენზე და ხელის მუხრუჭთან იარაღები, კერძოდ, პისტოლეტები ნახა. ასევე დასტურდება, რომ მან უშუალოდ დაინახა ლევან ბეროძე , ხოლო ვაზაგაშვილის ავტომანქანის რიგიდან გამოსვლის შემდეგ ბეროძე ასფალტის საფარზე დავარდნილი დაინახა.

დღესვე დაიკითხა ყოფილი პოლიციელი ვაჟა ლომიძე, რომლის ჩვენებითაც დასტურდება, რომ ის სპეცრაზმელებთან ერთად პირველი მივიდა ვაზაგაშვილის ავტომანქანასთან და ვაზაგაშვილის ავტომანქანაში წინა სავარძელში ორი პისტოლეტი დაინახა, მათ შორის ერთი მაკაროვი. ასევე დაინახა ფუთურუძის ავტომანქანიდან გადმოყვანისა და იარაღის დავარდნის ფაქტი. ვაჟა ლომიძემ აღნიშნა, რომ ხელისუფლების შეცვლის შემდეგ, ამ საქმესთან დაკავშირებით ჩვენების მისაცემად ის პროკურატურაში დაიბარეს და მასზე ადგილი ჰქონდა ზეწოლას. კერძოდ, მას უთხრეს, მიეცა გამოძიებისთვის სასურველი ჩვენება, რის შემდეგადაც სამსახურში დაწინაურებას დაპირდნენ. თუმცა, მან აღნიშნული არ გააკეთა და ის ერთი კვირის შემდეგ სამსახურიდან გაათავისუფლეს.

დღევანდელ სასამართლო პროცესზე ასევე გამოვიკვლიეთ ცააძისა და სინდოიანის ფარული ჩანაწერი, რითაც დასტურდება, რომ სინდოიანზე არანაირ ძალადობას ადგილი არ ჰქონდა. ცნობისთვის აღნიშნულ ფირზე ასახულია თუ როგორ ჰყვება სინდოიანი ამ საქმესთან დაკავშირებულ დეტალებს და იმას თუ სად უნდა მისულიყვნენ ისინი საყაჩაღოდ,“ - განაცხადა დავით ხაჟალიამ.