ბესიკ ხარძიანის შვილი მიხეილ ხარძიანი ბიზნესმენის მეორე მეუღლეს ეკა ნონიკაშვილს თაღლითობაში ადანაშაულებს.

ხარძიანმა ნონიკაშვილის წინააღმდეგ პროკურატურაში სარჩელი ცოტა ხნის წინ შეიტანა.

ბიზნესმენის შვილი ამბობს, რომ ნონიკაშვილმა ხარძიანთან თანაცხოვრების დროს შეძენილი ქონება უკანონოდ გაასხვისა მეგობრებზე და ახლობლებზე.

მაგალითად მიხეილ ხარძიანმა წყნეთში არსებული აგარაკი მოიყვანა. მისი თქმით, აგარაკის ღირებულება მილიონი ლარია და იგი ეკა ნონიკაშვილმა საკუთარ მეგობარს, ნაირა ნებიერიძეს 5 ათას ლარად მიჰყიდა. როგორც მოკლული ბიზნესმენის შვილი ამბობს, სულ საუბარია 3 მილიონი ლარის ღირებულების ქონების გასხვისებაზე.

„ეს ქონება უნდა გადანაწილებულიყო ჩემზე, ჩემს დაზე და ბებიაჩემზე. ეკა ნონიკაშვილმა საკუთარი ნებით, ან ვინმეს რჩევით ქონება გააჩუქა და გაყიდა. ეს არის უკანონო გასხვისება, მას ამის უფლება არ ჰქონდა, რადგან სამკვიდროს მიღების საშუალება შეგვიზღუდა მე, ჩემს დას და ბებიაჩემს“, - განაცხადა ხარძიანმა და იმედი გამოთქვა, რომ ნონიკაშვილს აღნიშნულის გამო საგამოძიებო უწყებები პასუხს მოსთხოვენ.