ისროლეს თუ არა ვაზაგაშვილის ავტომანქანიდან- ე.წ კორტების საქმის კიდევ ერთი მოწმე დაიკითხა

სამართალი - 18:36, 08 Oct, 2015

2554

ე.წ. „კორტების სპეცოპერაციის“ დღევანდელ სასამართლო პროცესზე ირაკლი ფირცხალავას დაკითხვა დასრულდა, პროცესზე ასევე დაიკითხა მოწმე გიორგი დარჯანიაც, რომელიც 2006 წლის 2 მაისს იყო პოლიციელი და რომელიც ზურა ვაზაგაშვილის ავტომანქანის თვალთვალს ახორციელებდა.

როგორც პოლიციის მაღალჩინოსნების ადვოკატი დავით ხაჟალია აცხადებს, მოწმის ჩვენებით დადგინდა რომ ვაზაგაშვილის ავტომანქანიდან გასროლა განხორციელდა, ამასთანავე გამოირიცხა საკონტროლო გასროლების ფაქტიც:

„დარჯანიას ჩვენებით დადგინდა, რომ ვაზაგაშვილის მმართვის ქვეშ მყოფი ავტომანქანიდან გასროლა განხორციელდა და ეს ტყვია მის მმართვის ქვეშ მყოფ ავტომობილს წინა საქარე მინაში მოხვდა. მან ასევე გამორიცხა შემთხვევის ადგილზე უცხო პირთა შესვლის ფაქტი, გამორიცხა საკონტროლო გასროლები და ხასგასმით აღნიშნა, რომ შემთხვევის ადგილზე სპეცრაზმელების გარდა არავინ ისროდა. გია დარჯანიამ ასევე დაადასტურა შემთხვევის ადგილზე ლევან ბეროძის ყოფნა და მასზე ავტომანქანის დაჯახების ფაქტი.

რაც შეეხება ირაკლი ფირცხალავას დაკითხვას, მისი დაკითხვის დროს, განზრახ მკვლელობის ბრალდებასთან დაკავშირებული საკითხები და კითხვები ბრალდების მხარის მხრიდან არ დასმულა და არ გამოკვლეულა“- განაცხადა დავით ხაჟალიამ

ე.წ. „კორტების სპეცოპერაციის“ საქმეზე მომდევნო სასამართლო სხდომა 12 ოქტომბერს 11:00 სთ-ზეა ჩანიშნული.

ე.წ. კორტების სპეცოპერაციის საქმეზე ძალოვანი უწყებების ყოფილი მაღალჩინოსნები კახბერ ნაკანი, ირაკლი ფირცხალავა, ლევან ბეროძე, გიორგი ცააძე და გრიგოლ კვინიკაძე არიან ბრალდებულები. დაკავებულებს ბრალად ე.წ. კორტების საქმეზე განზრახ მკვლელობა, მტკიცებულებათა ფალსიფიკაცია და განზრახ უკანონოდ დაკავება ედებათ.